Përfaqësuesja e Kosovës zhvendoset të hënën në Gjakovë për përgatitje intensive për dy ndeshjet kualifikuese

Përfaqësuesja A e Kosovës prej të hënës së ardhshme do të zhvendoset në Gjakovë për të vazhduar me përgatitjet intensive për dy ndeshjet kualifikuese të Kupës së Botës “Kina 2019”, kundër Hungarisë, respektivisht Polonisë.

Basketbollistët tanë do të qëndrojnë në Gjakovë prej 18 deri më 23 qershor, për tu kthyer më pas sërish në Prishtinë, ku do të vazhdojnë me përgatitjet e fundit para dueleve ndaj hungarezëve dhe polakëve.

Në Gjakovë do të stërvitet nga dy herë në ditë, prej orës 10:00 deri në 12:00 dhe 18:00 deri në 20:00.

Lexo po ashtu Për herë të parë ftohet në përfaqësuese, Altin Morina: Pres maksimumin e bashkëlojtarëve kundër Hungarisë dhe Polonisë

Ndërkaq sa i përket përgatitjeve që aktualisht po zhvillohen në Prishtinë, ku e gjithë skuadra është në grumbullim të përbashkët, sot stërvitjeve iu është bashkuar edhe përzgjedhësi Brad Greenberg, ndërsa në ditët e ardhshme pritet që në kryeqytet të zbarkoj edhe basketbollisti Erjon Kastrati.

Shtabit teknik kësaj radhe iu është bashkuar edhe një trajner turk, Ugur Vural, i cili po përkujdeset për formën kondicionale të lojtarëve.

Kosova më 28 qershor do të përballet me Hungarinë, kurse më 1 korrik do të ballafaqohet me Poloninë.

Të dyja ndeshjet Përfaqësuesja jonë do t’i luaj me fillim nga ora 20:30 në palestrën e vogël të Pallatit të Rinisë dhe Sporteve në Prishtinë.

Lexo po ashtu Renditja e re e FIBA-s: Kosova fiton katër pozita, Shqipëria renditet e 91-ta

Në Grupin C bëjnë gara Lituania, Kosova, Hungaria dhe Polonia. Prej secilit grup do të jenë tri skuadra që do të vazhdojnë garat në raundin e radhës.

Kosova në Dritaren e Parë u pati mposhtur në shtëpi të vet nga Lituania, kurse në udhëtim nga Hungaria, kurse në Dritaren e Dytë është mundur si mysafire nga Polonia dhe Lituania dhe aktualisht zë vendin e katërt të Grupit C.