Drenica me pikën e fituar në udhëtim siguron mbijetesën, Gjilani rrezikon barazhin dhe do ta luaj ndeshjen finale në Gjakovë

Gjilani ka lëshuar nga dora një mundësi të artë për t’i ikur barazhit pasi ka barazuar si vendas me Drenicën 1-1.

Gjilani e nisi më mirë ndeshjen dhe vetëm pas gjashtë minutave lojë arriti të shënonte golin e epërsisë.

Ishte sulmuesi kryesor i tyre, Betim Haxhimusa që realizoi në portën e Nezriti për 1-0.

Katër minuta më vonë, Haxhimusa pati një tjetër rast për të shënuar por kësaj radhe dështoi i vetëm përballë Nezirit.

Gjilani nuk i shfrytëzoi disa gjysmë raste të tjera për ta shënuar golin e dytë dhe erdhi kundërpërgjigja nga mysafirët.

Ishte minuta e 25-të kur mysafirët nga Skenderaj barazuan rezultatin në 1-1.

Hysen Tahiri goditi bukur ndërsa topin e devijoi në portë Denis Peposhi për ta barazuar rezultatin.

Deri në fund të pjesës së parë Gjilani rrezikoi edhe me Haxhimusën, Karabegun dhe Thaqin por pa sukses.

Me rezultatin e barabartë 1-1 përfunduan 45 minutat e para të kësaj sfide.

Gjilani e nisi furishëm pjesën e dytë duke kërkuar me ngulm golin e epërsisë, kur Thaqi tentoi me kokë por pa sukses.

Bardh e kuqtë tentuan pafundësisht shënimin e golit të fitores.

Armend Thaqi u shërbye në zonë mirë nga Papuqi por që goditja e tij me kokë ishte e plogësht.

Në minutën e 74-të, Haxhimusa në rast ideal dështoi të realizonte pas asistimit nga Kosumi.

Dy minuta më vonë, Betim Haxhimusa i vendasve tentoi shënimin e golit me kokë por shtylla ia mohoi një gjë të tillë.

Deri në fund nuk pati më gola të shënuar dhe Gjilani e Drenica ndanë pikët.

Drenica kësisoj ka siguruar mbetjen në elitë edhe për një stinor pasi zë vendin e pestë në 47 pikë të tubuara.

Gjilani kësisoj mbetet skuadra më e rrezikuar për të mbetur në barazh pasi zë pozitën e tetë me 45 pikë.

Në ndeshjen e ardhshme, Gjilani do të luaj në udhëtim te Vëllaznimi ndeshjen e sezonit.

Ndërkohë Drenica do të jetë nikoqire e Lirisë në stadiumin ‘Bajram Aliu’ në Skenderaj. /Telegrafi/