Dueli i mundshëm me Wilder, Joshua: Fillimisht të fitoj ndaj Parker, pastaj do t’i shikoj planet për të ardhmen

Gjatë konferencës së fundit për shtyp para meçit ndaj Joseph Parker, Anthony Joshua nuk ka mundur të mos flasë edhe për Deontay Wilder.

Tifozët e boksit janë shumë të interesuar për një duel ndërmjet kampionit të IBF, WBA dhe IBO, dhe atij të WBC.

Prandaj gjatë konferencës për shtyp, boksieri britanik është pyetur rreth përballjes së mundshme kundër boksierit amerikan.

Lexo po ashtu Të gjitha lajmet për Anthony Joshua

“Ti marrim duelet një nga një. Nuk e kuptoj pse po flitet aq shumë për Wilder. Unë po e shikoj Parkerin, i cili është një sfidues i vërtetë. Ai është kampion për një arsye”.

“Nëse dal fitimtar, atëherë mund t’i shikoj planet për të ardhmen. Tash për tash e ardhmja ime është të shtunën. Nuk dua të humb. Frika se mund të mposhtem, më bën që të vazhdoj përpara”.

“Po përgatitem për një meç prej 12 raundesh, gjë që nuk e kam problem ta çoj deri në fund. (Por) besoj se do ta nokautoj Parkerin pa kurrfarë dyshimi”, ka thënë Joshua.

Deontay Wilder vazhdon të jetë i pamposhtur në kategorinë WBC të peshave të rënda, pasi në fillim të këtij muaji e mbrojti titullin përballë kubanezit Luis Ortiz.

Lexo po ashtu Të gjitha lajmet për Deontay Wilder

Në këtë mënyrë, 32-vjeçari e ngriti në 40-0 rekordin e tij (39 nokaute), ndërsa pas fitores i kërkoi përballje Joshuas.

“Jam i gatshëm që tani. Gjithmonë kam thënë se e dëshiroj unifikimin (e titujve). Unë jam njeriu më i rrezikshëm në botë, njeriu më i keq në planet dhe këtë e kam dëshmuar… Shumë shpejt do të jetë vetëm një emër dhe ai do të jetë Deontay Wilder”, ishte shprehur boksieri. /Telegrafi/