Mourinho: Ibra do të luajë para Vitit të Ri

Jose Mourinho është i bindur se Zlatan Ibrahimovici do të kthehet në fushë para se të përfundojë ky vit.

Sulmuesi i Manchester Unitedit iu nënshtrua ndërhyrjes kirurgjike në muajin maj, si pasojë e lëndimit të ligamentit kryesor të gjurit, prandaj ka munguar në këtë fillimsezoni për Djajtë e Kuq.

Edhe pse 36-vjeçari ishte në fillet e rikuperimit të tij, Unitedi vendosi t’i ofronte kontratë të re njëvjeçare në muaji gusht dhe suedezi ikonik është duke iu afruar kthimit në fushë.

Lexo po ashtu Ibrahimovic: Do të rikthehem më fuqishëm

Madje, ai ka filluar të përfshihet edhe në seancat stërvitore me bashkëlojtarët e tij.

“Zlatan është këtu. Ai po stërvitet këtu dhe është nën kontrollin tonë. Është duke u angazhuar ashtu siç pritet nga ai – shumë, shumë fort”.

“Megjithatë, ai nuk do të kthehet në javën e ardhshme apo pas dy javësh. T’i japim kohë dhe të kthehet atëherë kur të gjithë do të mendojnë se është momenti i duhur”.

“A besoj se do të kthehet në vitin 2017? Po, besoj. Mirëpo, ky është vetëm një mendim”, ka thënë Mourinho.

Ibrahimovic ishte fantastik në sezonin e parë në Old Trafford, ku u transferua si lojtar i lirë nga Paris Saint-Germaini në vitin e kaluar.

Ai shënoi 27 gola në 45 ndeshje me Djajtë e Kuq dhe ndihmoi ta fitonin Ligën e Evropës dhe Kupën EFL. /Telegrafi/