Prishtina vendos për shtyrjen e ndeshjes miqësore me Genoan (Foto)

Klubi futbollistik, Prishtina ka vendosur që ndeshja miqësore e propozuar nga skuadra e njohur italiane, Genoa, të zhvillohet në një datë tjetër.

Klubi i njohur italian para disa ditëve kishte kërkuar me anë të një ftese nga klubi më i trofeshëm kosovar, Prishtina, një ndeshje miqësore.

Prishtina thuhet se e ka shqyrtuar mirë këtë kërkesë të Genoas, por vendimi i tyre final ka qenë që ndeshje të zhvillohet me një datë tjetër dhe jo me 6 gusht.

Arsyet e shtyrjes së kësaj miqësore sipas klubit kryeqytetas janë shkaku i mungesës së infrastrukturës dhe shpresojnë në mirëkuptim të Genoas, dhe në vizitën që do iu bëj klubi italian në muajin e ardhshëm do të vendosin për një datë të re për zhvillimin e kësaj miqësore.

Bardhekaltrit kanë bërë me dije se tifozët e skuadrës, por edhe futbolldashësit do të njoftohen me kohë kur të merren vendimin për datën e re të ndeshjes miqësore.

Komunikatë nga Bordi drejtues i FC Prishtinës

“Prishtinë, 28 korrik, 2017 – Pas ftesës së ardhur nga klubi i madh italian, Genoa, Bordi drejtues i FC Prishtina ka shqyrtuar dhe duke parë të gjitha rrethanat ka marrë vendim.

Së pari falënderon klubin italian Genoa për gatishmërinë e saj që me ndeshje miqësore të nderoj FC Prishtinën që do të duhej të zhvillohej më 6 gusht. Kjo ndeshje, me mirëkuptimin edhe të skuadrës së Genoas, shtyhet për një moment më të volitshëm ku data do të caktohet me rastin e vizitës së përfaqësuesve të klubit Genoa në Prishtinë më 9 gusht.

FC Prishtina iu njofton se shtyrja e datës së zhvillimit të kësaj miqësoreje është bërë për mungesë të infrastrukturës ku do të mund të zhvillohej kjo ndeshje, sepse stadiumi i qytetit ende është në rinovim e sipër.

Ndërsa, alternativa e vetme, stadiumi “Adem Jashari” në Mitrovicë, me rastin e ndeshjes me Norrkoping, na ka bindur se është shumë vështirë dhe gati e pamundshme të zhvillohet atje. Arsyet janë të shumta si distanca relativisht e madhe, punimet në rrugë dhe vështirësitë e mëdha që adhuruesit tanë prishtinas të na ndjekin nga afër.

Andaj, pas përfundimit të punimeve në stadiumin tonë edhe ndeshje do të bëhet e mundur dhe për datën e zhvillimit të kësaj ndeshje ju njoftojmë me kohë”. /Telegrafi/