Vetëvendosje “injoron” kushtin e LDK-së për njohjen e figurës të ish-presidentit Rugova

Lëvizja Vetëvendosje ka thënë se Kosovës i duhet zhvillim ekonomik dhe hapje të vendeve të reja të punës, dhe se nuk është koha e duhur për diskutuar për figurat historike.

Kështu, VV i ka kthyer përgjigje anëtarit të LDK-së, Arben Gashi, i cili tha ka thënë se kusht i LDK-së për të lidhur një koalicion me VV-në është njohja e figurës së ish-presidentit Rugova.

Shqipe Pantina nga Vetëvendosje i ka thënë Insajderit se qytetarët e vendit presin nga përfaqësuesit e tyre të merren me problemet e tyre dhe të shtetit.

“Vendi ka nevojë për zhvillim ekonomik që mundësojnë hapjen e vendeve të reja të punës, për të luftuar krimin dhe korrupsionin, për të siguruar lëvizje të lirë. Këto janë çështjet për të cilat kanë votuar qytetarët e vendit dhe kjo është çka presin nga qeveria e re. Çdo çështje tjetër, si ajo e emrave, figurave njohjeve e mos njohjeve nuk mendoj se aktualisht e ka vendin për të u trajtuar në tavolinën e bisedimeve”, ka thënë ajo për Insajderin.

Pantina më tutje ka ftuar koalicionin LAA që sa më shpejtë të fillojnë bisedimet pa humbur kohë fare.

“Unë mendoj se përfaqësuesit e të dy subjekteve pa asnjë vonesë duhet të fillojnë bisedimet për caktimin e prioriteteve dhe harmonizimin e programit qeverisës e sidomos të gjejnë zgjidhjen e pranueshme që do ishte në të mirë të vendit dhe të qytetarëve të saj për disa nga çështjet që kanë mbet pezull nga qeveria e kaluar”, ka thënë ajo.