Klubi i tij ka befasuar gjithë Gjermaninë, Abrashi: Duhet të vazhdojmë kështu

Njëri nga kampionatet më të mira në botë, padyshim që është ai gjerman Bundesliga.

Këtë vit ka pasur befasi të mëdha në Bundesliga, ku kihet parasysh edhe renditja e skuadrave si RB Leipzig, Hoffenheim e Hertha Berlin.

Por padyshim befasia më e madhe ishte Freiburgu i Amir Abrashit, që aktualisht ndodhet në pozitën e gjashtë me 41 pikë të tubuara, pozitë që i dërgon në Ligën e Evropës dhe këtë sukses nuk e kishte paraparë askush në Gjermani.

Freiburg ka lënë mbrapa vetës skuadra të mëdha si Schalke 04, Leverkusen, Wolfsburg, Frankfurt e Gladbach.

Mesfushori i Kombëtares së Shqipërisë, Amir Abrashi ka thënë për ‘Kicker’, se skuadra e tij dëshiron të vazhdoi me këto rezultate për të bërë befasi edhe më të mëdha.

“Skuadra është duke funksionuar për mrekulli dhe jemi të lumtur të gjithë për këtë”.

“Ka edhe gjashtë ndeshje deri në fund dhe ne fokusohemi vetëm tek ndeshja e radhës për të bërë më të mirën në fushë. Të shohim në fund çfarë do të ndodh dhe a do të arrijmë të dalim në Evropë”, ka deklaruar Abrashi.

27-vjeçari është i gatshëm për ndeshjen e radhës ndaj RB Leipzig, dy skuadra të inkuadruara në elitë.

“Është e rëndësishme që sa më shumë ta mbajmë rezultatin 0-0 dhe do të kemi mundësi më të mëdha për të fituar. Të shohim çfarë do të ndodh”, deklaroi Abrashi.

Pas 28 ndeshjeve në Bundesliga, Freiburg ka arritur të grumbullojë 41 pikë dhe ndodhet në pozitën e gjashtë por me gjasa reale që të kapin edhe një pozitë që i dërgon në Ligën e Kampionëve. /Telegrafi/