Në pritje të rinovimit të Strakoshës, portieri do të nënshkruajë me Lazion deri në vitin 2021

Portieri i talentuar shqiptar, Thomas Strakosha, i ka bindur të gjithë me paraqitjet e tij gjatë këtij sezoni dhe Lazio kërkon ta blindojë 21-vjeçarin.

Mediat italiane raportojnë se drejtuesit e klubit bardhekaltër me në krye drejtorin sportiv, Igli Tare, kanë bërë gati kontratën e re për Strakoshën që do të zgjasë deri në vitin 2021 dhe do ta lidhë gardianin kuqezi me klubin kryeqytetas për pesë vitet e ardhshme.

Strakosha, i cili këtë sezon bëri debutimin e tij në Serinë A, shkëlqeu në tri ndeshjet e tij të para me Lazion dhe si shpërblim tashmë përfiton rinovimin e kontratës, transmeton SuperSport.

Marrëveshja aktuale e 21-vjeçarit me bardhekaltërit skadon në 30 qershorin e vitit 2017 por në ditët e ardhshme, ish portieri i Salernitanas pritet të firmosë kontratën e re, nga e cila do të përfitojë dukshëm një pagë më të lartë se ajo aktualja.

Lexo po ashtu Strakosha me kontratë të re te Lazio

Strakosha për momentin është zëvendësi i Federico Marchettit te Lazio, por nëse paraqitet si në sfidën ndaj Milanit, portieri shqiptar ka shanse të mira për të qenë ai titullari i skuadrës së Simone Inzaghit në të ardhmen.