Grezda zëvendësues i Pjacas te Dinamo?

Eros Grezda është gati për të bërë hapin e madh në karrierë.

Mesfushori i kombëtares Shpresa të Shqipërisë i cili sezonin e kaluar ishte një nga lojtarët që shkëlqeu më shumë në kampionatin kroat me fanellën e Lokomotivës së Zagrebit ka përfunduar në radarët e Dinamos së Zagrebit.

Kampionët e Kroacisë e shohin 21-vjeçarin e lindur në Gjakovë si zëvendësueses ideal të talentit Marko Pjaca, i cili pak ditë më parë u transferua zyrtarisht te Juventusi për rreth 23 milionë euro.

Grezda për momentin është nën kontratë deri në 30 Qershor të vitit 2019 me Lokomotivën e Zagrebit. Megjithatë drejtuesit e Dinamos për të bindur skuadrën tjetër nga Zagrebi të lejojë largimin e lojtarit janë gati të ofrojnë një milion euro.

Pikërisht me këtë shumë vlerësohet kartoni i Eros Grezdës nga faqja e specializuar për transferimet e futbollistëve, transfermarkt.de. Te Lokomotiva do ta kenë të vështirë ti thonë jo Dinamos së Zagrebit nëse interesimi i këtyre të fundit është konkret duke ditur edhe marrëdhëniet shumë të mira që ekzistojnë mes drejtuesve të dy klubeve, transmeton SuperSport.

Dinamo Zagrebit e përdor Lokomotivën si një klub satelit ku huazon lojtarë të rinj të moshë të cilët arrijnë të fitojnë eksperiencën e nevojshme te kjo. Rasti më i fundit është ai një shqiptari pikërisht Endri Cekicit. Talenti i kombëtares shqiptare të 21-vjeçarëve luan që prej Janarit të vitit 2016-të nga Dinamo e Zagrebit te Lokomotiva në formë huazimi. Sa i përket Eros Grezdës me një kalim të mundshëm te skuadra më e madhe e futbollit kroat ai do të bënte një hap të rëndësishëm përpara në karrierën e tij pasi do ti jepej mundësia të luante edhe në fazën  e grupeve të një prej dy kompeticioneve më të rëndësishme evropiane, duke patur parasysh faktin që Dinamo e Zagrebit kualifikohet rregullisht në grupet e Ligës së Kampionëve ose Ligës së Evropës.

21-vjeçari shqiptar spikati sezonin e kaluar me Lokomotivën e Zagrebit teksa zhvilloi në total 29 ndeshje në kampionatin kroat duke realizuar edhe 9 gola, edhe pse luan në rolin e mesfushorit të krahut.