Shpresa e Realit për titull rilind në kështjellën e Barcës (Video)

Real Madridi e ka përmbysur Barcelonën në Camp Nou në superderbin botëror – ‘el Clasico’ duke triumfuar me rezultat 2-1.

Si gjithmonë kjo supersfidë dhuroi emocione të shumta edhe në duelin e radhës, në të cilin nuk mungoi magjia individuale dhe kolektive.

Ishte e pritshme që dominimi i kataluansve në posedim të ishte edhe në këtë përballje dhe ashtu ndodhi. Gjatë fraksionit të parë ishin vendasit ata që organizoheshin dhe sulmonin, ndërkohë që mysafirët mbroheshin dhe prisnin rastin për të ndëshkuar.

Luis Suarez lëshoi një rast pothuajse të sigurt për të kaluar Blaugranët në epërsi kur dështoi të shënojë afro një metër nga porta, e gjitha kjo pas një pasimi të bukur nga Neymar.

Një moment i dyshimtë ishte kur Ramos e ndali Messin në afërsi të zonës, derisa Navas në njërën anë dhe Bravo në anën tjetër u treguan të vëmendshëm për t’i ndalur rastet e kundërshtarëve.

Atë që nuk ia dolën ta bënin sulmuesit, në pjesën e dytë e bëri qendërmbrojtësi Gerard Pique. Pas një harkimi nga këndi të Rakitic, spanjolli i iku markuesit të tij dhe shënoi me kokë (56’).

Shumë shpejt erdhi reagimi i Realit për ta barazuar rezultatin. Një aksioni i organizuar mirë i Los Blancos u kompletua me gol. Toni Kroos dërgoi një harkim të mirë në zonë dhe Karim Benzema realizoi në mënyrë akrobatike (63’).

Në vazhdim të lojës, Mbretërit arritën të shënojnë, mirëpo gjyqtari e anuloi golin. Pas një harkimi në zonë, Gareth Bale shënoi me kokë, por arbitri mendoi se ky gol ishte i parregullt. Menjëherë pas, me një gjuajtje të bukur, Ronaldo e goditi shtyllën.

Dhe erdhi momenti kur Cristiano Ronaldo përmbysi gjithçka. Superylli portugez u bë sërish lojtari që heshti stadiumin ku është më i urryeri. Ai u asistua nga Bale në zonë, e gjeti hapësirën dhe shënoi (85’).

Me këtë fitore, Real Madridi e ka ngushtuar në shtatë diferencën e pikëve me Barcelonën dhe do të shpresojë që t’i ndryshojë gjërat deri në fund të sezonit. /Telegrafi/