Fitoi lotarinë milionëshe, por nuk largohet nga Njësia Speciale

Një pjesëtar i SAS-it është zotuar se do të vazhdojë t’i shërbejë vendit të tij edhe pse ishte bërë milioner pasi kishte fituar në lotari.

Pjesëtari i Forcave Speciale të Britanisë së Madhe, të cilit nuk i është bërë i ditur emri, por që thuhet se është në të tridhjetat, ishte bërë “ushtari më i pasur i skuadrës”, pasi kishte fituar lotarinë prej 1 milion funtesh, transmeton Telegrafi.

Pjesëtari i SAS-it, i cili është i martuar, pas fitimit të lotarisë i kishte ftuar bashkëpunëtorët e tij për pije, para se t’i dërgonte paratë e tij në fondin pensional.

Fituesi i lotarisë kishte vendosur të mos bënte publike një gjë të tillë. Gjithashtu kjo gjë ishte bërë edhe për shkak të pozicionit të tij në SAS.

Një burim i afërt me të, në bazën në Hereford, ka thënë për mediat e huaja se “ai e don aq shumë punën e tij dhe dëshiron të mbetet aty”.

Ai, i cili ka luftuar kryengritësit talibanë në Afganistan, ishte një ushtar i rregullt përpara se të bashkohet me SAS, pesë vjet më parë.

Ai vlerësohet si fituesi më top-sekret i lotarisë në shekullin 21. /Telegrafi/