Përkeqësohet situata e biznesit në Kosovë

Situata e bizneseve është përkeqësuar dukshëm në tremujorin e tretë të vitit 2015, krahasuar me tremujorin e tretë të vitit paraprak. Pengesë kryesore vlerësohet të jetë mungesa e porosive.

Pritjet për të ardhmen janë përkeqësuar për të gjithë sektorët, veçmas për sektorin e ndërtimtarisë dhe të shërbimeve. Këto vlerësime kanë dalë nga “Indikatori matës i tendencës në biznes: Tremujori i tretë i vitit 2015”, të bërë nga Oda Ekonomike e Kosovës (OEK). Anketimi përfshin tregtinë me shumicë dhe pakicë, prodhimin, ndërtimtarinë dhe shërbimet.

Pritjet për 6 muajt e ardhshëm janë më pak optimiste, ku 35 për qind e kompanive presin gjendje më të mirë të biznesit, e që krahasuar me tremujorin paraprak ka një rënie prej 17 për qind, që ishte 52 për qind, raporton KosovaLive.

Po ashti sipas këtij indikatori, vlerësimet për punësim kanë shënuar rënie për 5 për qind, ndërsa pritjet vlerësohen më të përkeqësuar në krahasim me tremujorin e vitit paraprak. Rreth 64 për qind e bizneseve presin që punësimi të mbetet i njëjtë.

“Gjetjet kryesore për punësim tregojnë që 11 për qind e kompanive të anketuara janë optimiste për rritje të punësimit në tre muajt e ardhshëm, kurse 8 për qind presin që numri i të punësuarve të ulet në tre muajt e ardhshëm”, thuhet në këtë indikator.

Ndërsa, pritjet për gjashtë mujorin e ardhshëm mbesin të njëjta krahasuar me periudhën e vitit të kaluar, ku 10 për qind e bizneseve të anketuara presin përkeqësim të situatës, ndërsa rreth 35 për qind janë optimiste për ditë më të mira të biznesit të tyre.

Kryetari i OEK-ut, Safet Gërxhaliu, theksoi se në vitin 2014 pengesat kryesore për të bërë biznes kanë qenë korrupsioni, burokracia dhe prokurimin publik, ndërsa në dy tremujorët e parë të këtij është energjia dhe furnizimi me energji elektrike, bazuar në një çmim të lartë i cili ndikon në dëmtimin e sektorit prodhues në Kosovë.

Ndërsa në tremujorin e tretë të vitit 2015 indikator tjetër me pasoja negative është mungesa e porosive që po dëmton kompanitë prodhuese dhe tregtare.

“Kjo vjen si rezultat i rënies së fuqisë blerëse, kryesisht për shkak të migrimit të të rinjve, ku sipas të dhënave në fillim të këtij viti Kosovën e kanë braktisur 120 mijë qytetarë. Po ashtu edhe punësimi i vogël që reflekton në rënien e fuqisë blerëse”, tha Gërxhaliu.

Sipas tij, Doganat e Kosovës raportojnë për një rritje të të hyrave për 13 për qind, mirëpo pranojnë se rritja më shumë është si dukuri e luftës së informalitetit dhe ekonomisë së kriminalizuar, por me një tendencë rënëse e aspektit kuantitativ, që do të thotë se më tepër kemi importe në krahasim me vitin 2014, indikator i cili është shqetësues.

Rekomandimet që duhet të adresohen janë që të gjenden alternativa për mbështetje të kompanive prodhuese; të kalohet në top prioritet zhvillimi ekonomik; krijimi i vendeve të reja të punës dhe kamatat e larta bankare. /Telegrafi/