Alkooli, çështje gjenesh!

Një tjetër copëz i bashkëngjitet mozaikut të raporteve mes gjeneve dhe sjelljes: një studim amerikan mbi të alkoolizuarit nxjerr në dritë lidhjen që ekziston mes profilit gjenetik me një "rrezik të vogël" e probabilitet të madh shërimi, me programin e psikoterapisë së 12 hapave, rekomanduar nga shoqata Alkoolistët Anonimë.

Është një mënyrë që jep rezultat e që fillon nga karakteristikat psikologjike të individit, duke u munduar të orientojë hapin pasardhës mjekësor, tipike e psikologjisë tradicionale. Kërkimet e fundit, përfshi edhe "Alcohol Research Center", janë publikuar në numrin e fundit të revistës "Alcoholism: Clinical & Experimental Research".

Varësia e një individi ndaj alkoolit ka të bëjë si me faktorët gjenetikë ashtu dhe natyrorë. Që prej disa vitesh, analizat gjenetike kanë treguar një përbërës të fortë të trashëguar në prirjen e të pirit (nga 52-64 për qind), me një shoqërim domethënës mes rrezikut të alkoolizmit dhe ndryshimet e shumta të ADN-së, të cilësuara si "polimorfizmi i vetëm i bërthamës" në brendësi të gjenit GABRA2 (kodifikimi i një klase receptorësh që përgjysmojnë efektet e GABA, neurotransmetuesi kryesor frenues i trurit).

Rezultate të reja tregojnë se gjenotipi GABRA2 jo vetëm që modifikon sjelljen e zakonshme në lidhje me pijen, por ndikon në suksesin e tipave të ndryshëm të psikoterapisë.

Alkoolizmi njihet si një ndër problemet më të rëndë të shëndetit publik. Ai nuk degradon vetëm individin, por edhe ambientin ku ai jeton, sepse efektet pasqyrohen në familje, punë dhe rrugë. Pse e përdorim pijen? Njerëzit pinë, sepse mendojnë se mund të kalojnë situata të vështira, zhgënjyese, por edhe të këndshme. Alkooli shërben për të mpirë emocionet dhe për të mbajtur një distancë nga ndjenjat, vetëdija. Një person i caktuar nuk e kupton se nga dy-tri gota që pi çdo ditë mund të kthehet në një "vartës" të tij.

Më poshtë, një metodë e thjeshtë ju mëson se si të mos i kaloni limitet: një dozë e përditshme, (rreth dy gota) e cila nuk duhet tejkaluar në asnjë rast, gjatë një periudhe disa mujore, edhe pse në të njëjtën kohë ndërhyjnë rrethana të veçanta që krijojnë interferenca emocionale (probleme në punë, debate me partnerin/en, martesat, funeralet, pushimet nga puna, rrëmujat, por edhe festat, udhëtimet, ngjarjet e shënuara etj.). Norma e lejuar parashikon vetëm dy gota dhe pa e tepruar. Vetëm në këtë mënyrë mund të zbuloni nëse e kontrolloni apo jo nevojën e të pirit, apo të kundërtën, nëse alkooli funksionin si rregullator i gjendjeve tuaja emocionale.

Studimet e fundit mbi fenomenin e "elasticitetit" – aftësia për të përballuar situata problematike – na mësojnë se gjenet nuk janë fat. Edhe pse ekziston një lidhje e ngushtë mes biologjisë dhe psikologjisë, i alkoolizuari cilido që të jetë profili i tij gjenetik mund të gjejë një mënyrë – përmes terapisë farmakologjike, psikologjike – për t‘u rilidhur me jetën. /shqip/