BONEVET zhvillon kreativitetin përtej të zakonshmes!

BONEVET ka filluar vitin 2017 plot entuziazëm duke vazhduar vazhdën e punës inovative, sukseseve, krijimit e duke inspiruar të rinjtë. Kjo hapësirë po ofron një mjedis të këndshëm për krijuesit duke u dhuruar atyre librat  që stimulojnë mendimin kritik e mënyrat më komplekse se si mund të vihet deri tek idetë revolucionare. Në BONEVET të rinjtë po kanë qasje në mjetet të hapit të fundit të teknologjisë, të dizajnuara për të ngritur vullnetin e të mësuarit të gjërave të reja dhe zhvillimit të kreativitetit.

Përmes shembujve praktik, demonstrimit të eksperimenteve interesante teknologjike e shkencore, të rinjtë po arrijnë të përvetësojnë mësimet rreth fizikës, elektronikës, teknologjisë, mekanikës, programimit e artit.

Krahas klasave që BONEVET ka zhvilluar, shumë nxënës kanë krijuar prototipa të shpikjeve interesante, duke trajtuar tematika të veçanta. Nga krijimet që kanë dalë si rezultat i punës së mentorëve profesionalist, krijuesit janë dekoruar me çmime të vlefshme të teknologjisë e inovacionit, në nivel kombëtar e internacional.

I tillë ishte suksesi i dy krijuesve të parvjetshëm të BONEVET-it, Granitit dhe Ajrit, në festivalin “CODE Fest”, ku patën prezantuar krijimin e quajtur “Makers Network”. Ata kishin krijuar një aplikacion telefonik të cilin mund ta përdorin krijuesit në mbarë botën, për t’u socializuar, shpërndarë ide, e për të kontribuar në projekte të përbashkëta në mes vete.

BONEVET mëton të sfidoj limitet e produktivitetit të të rinjve, duke i sfiduar ata me imagjinatën e tyre, e duke i motivuar për të qenë shpikësit e së ardhmes. Kjo qendër kreative edukon fëmijët e të rriturit që të mendojnë jashtë të zakonshmes. Si hapësira e vetme e këtij lloji në rajon, BONEVET është mekanizmi kyç që i fuqizon të rinjtë në profesionet moderne.

“Edukimi kreativ që BONEVET zhvillon është çelës adekuat për studentët e Kosovës për t’i profesionalizuar ata në tregun global”, ishin përshtypjet e ambasadorit amerikan Greg Delawe, kur vizitoi hapësirën dhe u takua me krijuesit.

BONEVET ndryshoi rrjedhën e edukimit formal duke përfshirë shkencën, teknologjinë e inovacionin në arsimimin publik. Nga kjo iniciativë u mundësoi mbi 70 nxënësve të mësojnë për elektronikën, programimin e robotikën. Këto klasa kreative u vlerësuan si kontributi më i mirë për komunitetin në vitin 2016 nga FIDES Awards.

Krijuesit e BONEVET u cilësuan si Yjet në Ngritje edhe gjatë ICT Awards, ku me krijimet e tyre përfshinë nevojat e veçanta të të verbërve dhe vetëdijesuan komunitetin për ndotjen e ambientit, duke ndërtuar pajisje që tregon informacione të detajushme rreth ndryshimeve të ajrit, temperaturës etj.

Gjatë këtij viti, BONEVET fillon edhe me klasa të reja të cilat përkojnë me interesat e komunitetit dhe zgjojnë dëshirën për krijim. BONEVET është qendër kreative që promovon zbulimet, shpikjet e novatorizmin.