Berisha: Shqipëria merr një rëndësi nevralgjike në rajon

Qeveria shqiptare miratoi në parim tekstin e marrëveshjes mes tre vendeve: Shqipërisë, Italisë dhe Greqisë, për gazsjellësin TransAdriatik (TAP). Ndërsa e ka vlerësuar si historike marrëveshjen bilaterale mes tre vendeve, Kryeministri Sali Berisha deklaroi në mbledhjen e qeverisë se Shqipëria me ndërtimin e TAP-it merr një rëndësi nevralgjike për energjinë në rajon.

“Gazsjellësi TAP do të transportojë gazin nga deti Kaspik, Azerbajxhan, në Europën Perëndimore dhe që kalon në territorin shqiptar në rreth 200 km dhe përfundon në Itali. Gazsjellësi TAP është projekti më i leverdishëm nga të gjitha projektet e tjera. Leverdia e Shqipërisë për këtë projekt është jashtëzakonisht i madh por edhe angazhimi i saj ka qenë i madh gjatë këtyre viteve. Shqipëria merr një pozicion nevralgjik në fushën e energjisë në rajon pasi vetë pozicioni gjeografik është shumë i rëndësishëm dhe është jo vetëm një vendkalim i gazsjellësit drejt Italisë po ekziston një potencial që gazi krahas trajktores së tanishme gazi të shkojë deri në Ballkanin e Veriut”, tha kryeministri.

Kryeministri Berisha theksoi se ndërtimi i gazsjellësit TAP është një shans shumë i madh për Shqipërinë, pasi do ketë mundësi të ndërmarrë gjatë mandatit që vjen gazifikimin e vendit, që nënkupton përdorimin e gazit për ngrohje dhe gatim.

“Do ketë shpenzime më të ulëta për çdo familje për ngrohje e gatim, pra rritje të mirëqenies për shqiptarët”, theksoi Berisha.

Sipas kryeministrit Berisha, marrëveshja e cila miratohet sot së bashku me projektin e Kaskadës së Devollit do e shndërrojnë Shqipërinë në vend të zhvilluar.

“Kush do mund të imagjinonte ndonjëherë se në 2 projektet më të mëdha në historinë e vendit do kishte peshë kryesore një prej vendeve më veriore të Evropës, Norvegjia”, shtoi më tej Berisha.

Projekti TAP, që mbështet nga qeveria shqiptare kalon në Turqi, Greqi dhe përmes Shqipërisë përfundon në Itali. Një vendim përkatës pritet të merret në muajin qershor nga konsorciumi i Shah Denizit, që do të zgjedhë se cili midis dy projekteve në garë: TransAdriatik apo Nabucco West i cili e lë Shqipërinë jashtë rrjetit ndërkombëtar të gazit do të transportojnë gazin e Kaspikut drejt Europës. /Telegrafi/