“Zurich Shqip Up Comedy” shënohet si festivali më i madh i stand-up komedisë i mbajtur në Zvicër

Të shtunën e 21 tetorit, në Cyrih të Zvicrës është organizuar festivali vjetor tashmë, ‘Zurich Shqip Up Comedy Festival”.

Ky festival i cili sjell stand-up komedi të ndryshme nga aktorë shqiptarë por edhe të huaj, mblodhi një audiencë të gjerë prej më shumë se 900 personash në teatrin “Spirgarten” të Cyrihut.

Mbrëmja filloi rreth orës 19:00 me hyrjen e të ftuarve, të cilët ishin kryesisht shqiptarë nga diaspora, emra specialë dhe shumë fytyra publike në Zvicër.

E teksa u rehatuan në ulëset e teatrit, erdhi radha për shfaqjen, moderimi i së cilës i ishte besuar bukuroshes Shqipe Sylejmani.

Festivali nisi me një fjalë rasti nga organizatori Ridvan Murati, i cili iu premtoi të pranishmëve një shfaqje për të mos u harruar dhe që e tillë rezultoi në fund të saj.

Siparin e edicionit të dytë të “Shqip Up Comedy Festival” e nisi aktori i njohur nga Gjakova, Edi Kastrati, i cili bëri një interpretim fantastik me shumë të qeshura në skenë.

I dyti në radhë ishte aktori Kushtrim Qerimi, i cili gjithashtu dhuroi një performancë të hatashme që shkaktoi shumë të qeshura para një audience, e cila numëronte mbi 900 pjesëmarrës.

Dhe kështu pjesa e parë e stand up komedisë u përmbyll me aktorin nga Shqipëria, Romir Zalla, i cili është i njohur për skeçet e tij tashmë të panumërta, kryesisht në programin “Portokalli”.

Pas kësaj, të gjithë të ftuarit shijuan një pazë të shkurtër prej 20 minutash, ku të gjithë u freskuan me nga një pije në sallë “Spirgarten”, ku edhe po mbahej ky festival.

Mbrëmja vazhdoi me aktoren zvicerane, Olivia, e cila pati një stand-up në gjuhën gjermane, për të gjithë të ftuarit e huaj që gjendeshin në sallë – e që nuk ishin të paktë në numër.

Gjatë gjithë kohës, kishte dukje dhe tenativa të herëpashershme të aktores Olta Daku për të dalë në skenë, por asaj asnjëherë nuk iu dha fjala pasi ishin të tjerët në radhë – dhe kjo ishte e gjitha pjesë e skenarit.

Në radhë ishte aktori i njohur nga Gjilani, Ernest Zymberi, i cili e mbushi sallën me të qeshura dhe u përshëndet me duartrokitje të shumta nga publiku i pranishëm.

I parafundit në skenë ishte aktori i humorit Avni Shkodra, i cili me skeçin e tij i riktheu në kujtimet e fëmijërisë së viteve ’90 shumë të pranishëm, gjersa pati një nderim të veçantë edhe për Policinë e Kosovës në fund të stand-upit.

E fundit që përmbylli festivalin  stand-up komedisë ishte aktorja e shumë pëlqyer e publikut, Valina Muçolli, e cila i argëtoi të pranishmit me trillimin e një historie që përfshin problemet sociale të ditëve të sotme.

Në fund të mbrëmjes, organizatorët Ridvan Murati dhe Alban Hamza patën falënderime për të gjithë partnerët e festivalit dhe të pranishmit, duke premtuar se edicioni i tretë do të jetë edhe më i madh se ky i sivjetmi.

“Shqip Up Comedy Festival” në bazë të përllogaritjeve, ka rezultuar se është festivali i stand-up komedisë me audiencën më të madhe në Azvicër, duke i tejkaluar organizimet e ngjashme nga organizatorët zviceranë, italianë apo edhe gjermanë në këtë shtet. /Telegrafi/