Zelensky: Rusia ka ende mjaft raketa për disa sulme të tilla masive

Presidenti ukrainas, Volodymyr Zelensky deklaroi se Rusia ka ende mjaft raketa për disa sulme të tilla masive, siç ishte rasti i 16 dhjetorit.

“Ne kemi mjaft vendosmëri dhe vetëbesim për të kthyer tonat pas këtyre goditjeve”, u shpreh Zelensky në adresimin e tij të mbrëmjes, transmeton Telegrafi.

“Pavarësisht se çfarë po llogarisin fanatikët e raketave nga Moska, kjo ende nuk do të ndryshojë ekuilibrin e fuqisë në këtë luftë”, shtoi ai.

Ai kujtoi se 60 nga 76 raketat u rrëzuan. “Por, për fat të keq, ka goditje. Terroristët kanë nevojë për një masë të tillë sulmesh me raketa që të paktën një pjesë e “produkteve” të tyre të arrijnë objektivat e synuara. Të gjitha objektivat e tyre sot janë civilë, dhe këto janë kryesisht objekte të furnizimit me energji dhe ngrohje”, u shpreh Zelensky.

“Ndoshta, si rezultat i kësaj lufte, kuptimi i fjalës ‘terror’ për shumicën e njerëzve në botë do të lidhet kryesisht me veprime të tilla të çmendura të Rusisë”.

Më 16 dhjetor, Rusia kreu sulmin e 9-të masiv në infrastrukturën energjetike të Ukrainës. Gjysma e konsumatorëve kanë mbetur pa energji elektrike. /Telegrafi/