Zelensky denoncon “të keqen që nuk njeh kufi” të Rusisë, pas sulmit ku mbetën të paktën 30 të vdekur në një stacion treni në Ukrainë

Presidenti ukrainas Volodymyr Zelensky denoncoi të premten një “të keqe që nuk njeh kufi” nga Rusia pas sulmit me raketa në stacionin Kramatorsk në lindje të vendit, nga i cili janë evakuuar civilët.

“Pa forcën dhe guximin për t’u përballur me ne në fushën e betejës, ata (rusët) po shkatërrojnë në mënyrë cinike popullatën civile. Është një e keqe që nuk njeh kufi. Dhe nëse nuk ndëshkohet, nuk do të ndalet kurrë”, ka thënë Zelensky, duke denoncuar metodat “çnjerëzore” të forcave ruse, përcjell Telegrafi.

Reagimi i tij vjen pasi më shumë se 30 njerëz u vranë dhe mbi 100 të tjerë u plagosën në një sulm me raketa ruse në Ukrainën lindore, ndërsa civilët u përpoqën të evakuoheshin në pjesë më të sigurta të vendit, tha kompania shtetërore hekurudhore.

Lexo po ashtu 'Tridhjetë të vdekur dhe 100 të plagosur' ndërsa raketa ruse godet stacionin hekurudhor ukrainas të mbushur me qindra civilë që po tentonin të iknin nga luftimet

Sulmi ishte në stacionin e trenit të Kramatorsk, me pamje që tregonin trupa të shpërndarë nëpër tokë, të shtrirë mes bagazheve të braktisura.

Disa ishin futur tashmë në qese, ndërsa fotot e tjera tregonin tymin që dilte nga stacioni ndërsa zjarrfikësit punonin në vendngjarje.

“Dy raketa goditën stacionin hekurudhor Kramatorsk. Njerëzit janë lënduar. Ne po sqarojmë detajet”, shkroi në rrjetet sociale Alexander Kamyshin, kreu i kompanisë hekurudhore të Ukrainës. /Telegrafi/