Zelensky: Askush nuk e di se sa do të zgjasë lufta në Ukrainë

Në adresimin e tij më të fundit përmes një videoje të realizuar, presidenti ukrainas Volodymyr Zelensky ka thënë se askush nuk e di se sa do të zgjasë lufta në Ukrainë, por lavdëroi forcat e armatosura të Ukrainës që po bëjnë të pamundurën të ndalin avancimin e ushtrisë ruse.

Zelensky deklaroi se është krenar me ukrainasit që po ndalin avancimin e rusëve në rajonin e Donbasit, transmeton Telegrafi.

“Kujtoni se si në fillim të majit, në Rusi shpresonin se do të okupojnë Donbasin lehtë. Është dita e 108 e luftës, në qershor, Donbasi po mbahet fuqishëm”, shtoi presidenti ukrainas.

Lexo po ashtu Për të fituar luftën në Ukrainë, Putini po përgatitet t’i çojë drejt urisë vendet në zhvillim

Deri më tani forcat ruse kanë dështuar në marrjen nën kontroll të Kievit, ku ukrainasit i detyruan rusët të tërhiqen dhe rifokusohen në Donbas.

Ai ka ripërsëritur se akoma nuk ka indikacione që tregojnë se lufta në Ukrainë është pranë fundit – duke theksuar se vendi i tij do të bëjë gjithçka që rusët “të pendohen se çfarë kanë bërë dhe të japin llogari për çdo vrasje dhe sulm mbi këtë vend të bukur”. /Telegrafi/