Zaev-Stoltenberg: Maqedonia e Veriut mbetet e përkushtuar ndaj reformave demokratike dhe orientimit euro-atlantik

Siç njoftojnë nga LSDM, sekretari i Përgjithshëm i NATO-s, Jens Stolgenberg në bisedë telefonike i ka uruar Zaevit fitoren në zgjedhjet e parakohshme kuvendare dhe, siç thonë nga kjo parti, ka shprehur kënaqësi që në Maqedoninë e Veriut është rizgjedhur udhëheqësia politike e cila me hapa të guximshëm dhe politika të drejta e çoi vendin në NATO.

Si♪ thuhet në njoftim, bashkëbiseduesit janë pajtuar se me këtë është vërtetuar përcaktimi i vendit, si vend anëtar në NATO, se do të vazhdohet me rrugën reformuese qv do të thotë zhvillim, përparim dhe stabilitet, njofton Telegrafi Maqedoni.

“Posaçërisht e rëndësishme është, theksoi Stoltenberg, që kjo ndodhi pas zgjidhjes së problemeve të mëdha në plan ndërkombëtar dhe pas zbatimit të reformave thelbësore brenda, që vërteton kapacitetin demokratik të popullatës në Maqedoni”, thuhet në njoftim.

Zaev ka falënderuar për urimet dhe ka theksuar se në këto zgjedhje është dëshmuar se qytetarët mbështetin përkushtimin dhe kursin reformues të Qeverisë së udhëhequr nga LSDM.

Ai tha se edhe Maqedonia e Veriut mbetet e përkushtuar fuqishëm në reformat demokratike dhe orientimin euro-atlantik.

“Dy bashkëbiseduesit u pajtuan se ka pasur zgjedhje të dinjitetshme, fer dhe demokratike, ashtu siç i ngjan një vendi anëtar të NATO dhe një vend që fillon bisedimet me BE-në”, thuhet në njoftimin e LSDM-së.

Zaev në bisedë ka theksuar se Qeveria e re, e udhëhequr nga LSDM, do të vazhdojë me përkushtim të punojë, posaçërisht në fushatën e përparimit ekonomik, reformave në sistemin gjyqësor si dhe në politikat që do të sjellin zhvillim dhe jetë të mirë për qytetarët.

“Sekretari i Përgjithshëm tha se gjatë periudhës së ardhshme do të vazhdojë bashkëpunimi mes NATO-s dhe Maqedonisë së Veriut si anëtare e NATO-s, por edhe bashkëpunimi dhe mbështetja në kuadër të tejkalimit të të gjitha sfidave me të cilat po ballafaqohemi”, informojnë nga LSDM.

Stoltenberg është interesuar edhe për gjendjen e COVID-19 duke thënë se “NATO është këtu për të ndihmuar, gjithmonë kur është nevoja”.

“Kryetari Zaev falënderoi dhe theksoi se shteti ka reaguar shpejt dhe në kohë në lidhje me coronavirusin dhe nuk lejoi të ngarkohet sistemi shëndetësor, siç ndodhi në disa vende të tjera”, thuhet në njoftim./Telegrafi/