Vlerësohet e lartë kamata prej 7% për “Kosovën e Re”

Deputetët e Kuvendit të Kosovës e kanë kritikuar normën e lartë të interesit për kredinë me të cilën do të financohet ndërtimi i termocentralit “Kosova e Re”.

Rreth 700 milionë euro për ndërtimin e termocentralit “Kosova e Re” do të sigurohen përmes kredive. Gjatë raportimit para Komisionit Parlamentar për Zhvillim Ekonomik, të martën, ministri i Zhvillimit Ekonomik, Blerand Stavileci, ka thënë se norma e interesit për kredinë, me të cilin do të financohet 70 për qind e projektit, do të jetë rreth 7 për qind.

Kompetenca për negocimin e këtyre kredive i është lënë kompanisë “Contour Global”, e cila është shpallur ofertues i preferuar nga Qeveria e Kosovës për jetësimin e termocentralit 500-megavatesh, shkruan sot Koha Ditore.

Muhamet Mustafa, kryetar i Komisionit parlamentar për Zhvillim Ekonomik ka thënë se norma prej 7 për qind është shumë e lartë për projekte të tilla të mëdha. Ka kërkuar nga Qeveria e Kosovës që të përfshihet në negociata bashkë me “Contourin” në mënyrë që të ulet kjo normë e interesit prej 7 për qind.

Ka marrë përgjigje të menjëhershme nga ministri Blerand Stavileci, i cili ka thënë se Qeveria nuk është palë në negociatat për sigurimin e financimit të këtij projekti, pra të kredisë.

Ndërtimi i termocentralit “Kosova e Re” pritet të ketë një kosto prej 1 miliard eurosh. /Telegrafi/