Veç me një vendim të Qeverisë pajtohet Vetëvendosje

Kryetari i Lëvizjes Vetëvendosje, Visar Ymeri, ka qenë kritik ndaj udhëheqjes së deritanishme të institucioneve te Kosovës, duke thënë se asnjë vendim i Qeverisë së Kosovës nuk ka qenë pozitiv në zhvillimin e vendit.

“Të këqijat që kanë ardhur nga kjo Qeveri, janë të rrezikshme për Kosovën”, tha Ymeri.

I pyetur nëse ka ndonjë vendim apo veprim të kësaj qeverie me të cilin pajtohet Lëvizja Vetëvendosje, Ymeri tha se megjithatë është një gjë për të cilën mund të pajtohet. Sipas tij, fjala është për vendimin për shkarkimin e ish-ministrit Aleksandar Jabllanoviq, i cili pati përdorur gjuhë të urrejtjes ndaj nënave gjakovare.

Në një intervistë për RTK-në, ai thotë se marrëveshja për shënimin e kufirit të Kosovës me Malin e Zi cakton kufij të ri të Kosovës.

“Kjo është e vërteta dhe këtë të vërtetë e kanë nxjerr në pah ekspertët”, tha Ymeri.

Sipas tij, shënjimi i vijës kufitare me Malin e Zi është i domosdoshëm, por me interesa të të dyja palëve. Ndërsa, shprehet se ratifikimi i marrëveshjes për demarkacionin me Malin e Zi, nuk ka qenë kriter i deritanishëm nga ana e Bashkimit Evropian për liberalizmin e vizave.

Duke komentuar deklaratën e ish kryetarit të VV-së, Albin Kurti, se gjasat për luftë në Ballkan janë më të mëdha se gjasat që të mos ketë luftë, Ymeri pati një shpjegim: “Shmangia e imponimit të një marrëveshje të tillë, rrit gjasat për një luftë. Pra, ne nuk po bëjmë thirrje për luftë, por po themi diçka që e ka thënë edhe një gazetë ndërkombëtare. Çka po ndodh me Kroacinë, me Bosnjën, këto tregojnë që Ballkani ka ma shumë gjasa të shkojë në luftë se sa të mos shkojë”.

Ymeri ka folur edhe për miratimin e ligjit për Trepçën në Kuvendin e Kosovës, duke thënë se ky ligj nuk garanton mos privatizimin e këtij gjiganti ekonomik.