Ushtria amerikane i jep fund misionit të skelës lundruese në Gazë

Ushtria amerikane ka përfunduar misionin e saj me skelën e përkohshme lundruese për të ofruar më shumë ndihma në Rripin e Gazës, pasi ai ishte penguar nga moti, problemet teknike dhe ato të sigurisë.

Bëhet e ditur se furnizimet nga Qipro do të dërgohen tani me anije amerikane në portin izraelit të Ashdod dhe më pas do të transportohen me kamion në Gazën veriore nëpërmjet një kalimi të kontrolluar nga Izraeli, ka njoftuar zëvendëskryetari i Komandës Qendrore.

Zëvendësadmirali Brad Cooper këmbënguli se skela kishte mundësuar një “rritje” të dërgesave të ndihmave, duke vënë në dukje se më shumë se 9,000 ton ishin dorëzuar gjatë dy muajve.

Megjithatë, ajo ishte funksionale vetëm për rreth 20 ditë dhe ishte jashtë funksionit që nga 28 qershori për shkak të motit të keq, shkruan BBC, përcjell Telegrafi.

OKB-ja dhe organizata të tjera humanitare kanë thënë se totali i dorëzuar përmes skelës përfaqëson një pjesë të vogël të ndihmës që kërkohet nga 2.2 milionë palestinezë në Gazë, të cilët thonë se 500 kamionë me ndihma dhe furnizime tregtare nevojiten çdo ditë.

Ata gjithashtu kanë deklaruar vazhdimisht se mënyra më efektive dhe efikase për të marrë ndihma në Gazë është përmes rrugëve tokësore, gjë që e ka pranuar edhe SHBA-ja.

“Vlerësimi ynë është se skela e përkohshme ka arritur efektin e saj të synuar për të rritur një vëllim shumë të lartë ndihme në Gazë dhe për të siguruar që ndihma të arrijë civilët në një mënyrë të shpejtë”, tha Cooper.

Lexo po ashtu Parlamenti izraelit hodhi poshtë për herë të parë idenë e shtetit palestinez

Cooper gjithashtu argumentoi se misioni kishte qenë me kosto efektive, duke thënë se kishte kushtuar më pak se vlerësimi fillestar prej 230 milionë dollarëve.

Kur skela filloi të funksionojë në mes të majit, zyrtarët amerikanë sugjeruan se do të qëndronte në vend deri në gusht ose shtator.

Por, pas motit të keq në fund të majit, katër mjete të përfshira në operacion u shkatërruan dhe u hodhën në breg.

Pjesë të skelës duhej të çoheshin në Ashdod për riparime. E gjithë struktura duhej të zhvendosej në Ashdod tre herë të tjera për shkak të motit të keq dhe mirëmbajtjes përpara se ushtria amerikane të vendoste t’i jepte fund misionit.

Javën e kaluar, edhe presidenti amerikan, Joe Biden, shprehu zhgënjimin me misionin e skelës, duke thënë: “Unë shpresoja se do të ishte më i suksesshëm”. /Telegrafi/