Trepça ’89 gjen fitoren pas katër ndeshjeve, mposht Drenicën

Trepça ’89 ka fituar me rezultat minimal 1-0 ndaj Drenicës në ndeshjen e vlefshme për javën e 25-të të Superligës së Kosovës.

Minatorët i janë kthyer fitores në kampionatin kosovar pas katër ndeshjeve, një humbje dhe tri barazimeve në këtë fillim sezoni pranveror.

Vendasit e nisin më mirë takimin duke sulmuar me anë të Fiton Hajdarit (5′, 27′), por dy gjuajtjet e tij shkuan afër portës

Drenica u kthye në lojë duke tentuar me Genc Hamitin (30′), i cili gjuan për mrekulli, por portieri Bledar Hajdini devijon topin në fundore.

Trepça ’89 provoi edhe me Orlovski (41′) dhe Otto John (43′), ku i pari godet traversën me një parabolë, ndërsa i dyti gjuan jashtë portës dhe skuadrat shkojnë pa gola në pushim.

Skuadra e trajnerit Gugash Magani e nisi pjesën e dytë menjëherë në sulm, duke tentuar me John (46′), i cili i vetëm me Neziri, nuk arriti të shënoj me portierin që shpëtoi gol të sigurt.

Skuadra nga Riza Lushta provoi edhe me kapitenin Shpëtim Idrizi (72′), i cili gjuajti nga 30 metra, por e priti Neziri, ndërsa golin e gjetën vetëm në minutën e 84-të, ku John shfrytëzoi në maksimum një gabim të Nezirit, për të shënuar për 1-0, rezultat që doli përfundimtar i ndeshjes.

Pas kësaj fitore, Trepça ’89 gjendet në pozitën e shtatë me 39 pikë, ndërsa Drenica në vendin e tetë me 36 pikë. Në takimin e radhës, Minatorët luajnë në udhëtim te Feronikeli, ndërsa Drenica udhëton te Vëllaznimi. /Telegrafi/