Stavileci: Zhvillimi ekonomik, nuk fillon e as nuk përfundon me vitin 2015

Ministri i Zhvillimit Ekonomik, Blerand Stavileci, ka thënë se zhvillimi ekonomik i vendit nuk nis e as nuk përfundon me vitin 2015. “E para zhvillim ekonomik as nuk nis por as nuk përfundon me vitin 2015, është një proces në të cilin duhet kaluar e të cilin nuk e bënë vetëm një ministri”, tha ai në emisionin “Ballë për Ballë” në Klan Kosova.

Stavileci është shprehur se duke e pasur parasysh gjendjen politike në vend atëherë ata kanë bërë çfarë ishte e mundur. “Secila qeveri do ta kishte pasur të vështirë edhe pas një situate në të cilën kemi kaluar sidomos në vitin 2015-të, pas një paralize institucionale për 6 muaj. Secili prej nesh, kemi performuar mjaft mirë duke i pasur për bazë këto rrethana”.

Ai më pas ka thënë se nuk mund të flitet për zhvillim ekonomik nëse nuk zgjidhet problemi me energjinë, e kështu e ka përmendur projektin “Kosova e Re”. “Ne kemi pasur disa projekte mbi të gjitha Kosovën e Re, që mund të nisi etapën e zhvillimit ekonomik”.

Stavileci më pas është shprehur se ky ishte viti i fundit që pritej të nënshkruhej projekti për “Kosovën e Re”. “Projekti “Kosova e Re” ka nisur në vitin 2005, po të zgjidhej në atë kohë ne tani nuk do të flisnim për këtë gjë”.

“Me këtë projekt e kemi bindur një investitor amerikan që të bëjë investime private prej 1 miliard eurosh”.

Ministri ka thënë se rritja e çmimit të energjisë është e padiskutueshme për arsye se Kosova nuk prodhon vetë energji. “Edhe po të mos jetë Kosova e Re do të ketë rritje sepse jemi të varur nga importi. Po të mos e lëmë vendin tonë në varësi të importit duhet të prodhojmë vetë”, tha i pari i MZHE-së.

Ai ka thënë se kanë bërë më të mirën e mundshme për të realizuar më së miri këtë projekt. “Si ka qenë projekti i dizajnuar në të kaluarën atëherë do të kishte rritje 100 për qind, e tani është 28 për qind në gjashtë vite”. /Telegrafi/