Sot 15 vite më parë Interi humbiste titullin në ndeshjen e fundit, lotët e Ronaldos dhe zhgënjimi i interistëve për titullin e pritur me vite (Foto/Video)

Në Itali data e 5 majit është shumë e njohur në botën e futbollit. Tifozët e Interit dhe ata të Juventusit nuk e harrojnë lehtë këtë data.

Interistët do ta kujtojë gjithmonë një nga zhgënjimet më të mëdha të histori, ndërsa bardhëezinjtë një nga gëzimet më të paparashikuara.

Interi kishte 13 vite pa fituar titullin kampion në Itali dhe shkonte në ndeshjen e fundit ndaj Lazios me avantazhin e një pike ndaj Juventusit.

Mendohej se do të ishte një formalitet, por zikaltërit u shpërbënë plotësisht edhe pse ishin në avantazh dy herë me anë të Vierit dhe Di Biagios,transmeton panoramasport.

Dy gola të Karel Poborskyt dhe pastaj Diego Simeone e Simone Inzaghi, vulosën një fitore të bujshme 4-2 të Lazios në një stadium ku edhe tifozët vendas në fakt kishin filluar të mbështetnin Interin.

Lotët e Materazzit dhe sidomos të Ronaldos, i cili pak ditë më vonë i dha lamtumirën me polemika klubit për t’iu bashkuar Real Madridit, treguan më së miri ankthin që u përjetua atë ditë në kampin zikaltër.

Ndërsa në atë bardhezi filloi festa, pasi Juventusi mundi 2-0 Udinesen me golat e Trezeguet dhe Del Piero, për të festuar titullin e radhës.