Shtëpia e Bardhë do ta mirëpriste ndihmën e Trumpit në promovimin e vaksinimit

Shtëpia e Bardhë tha se do të mirëpriste ndihmën e ish-presidentit, Donald Trump në promovimin e vaksinës për mbështetësit e tij, por përmendi mënyra të tjera për të bindur konservatorët për t’u vaksinuar.

“Nëse ish-presidenti Trump zgjohet nesër dhe dëshironte të ishte më i zëshëm për sigurinë dhe efikasitetin e vaksinës, sigurisht që ne do ta mbështesnim atë”, tha sekretarja e shtypit, Jen Psaki në një konferencë shtypi të hënën, raporton cnn.

Lexo po ashtu Mediat amerikane: Donald Trump dhe Melania morën vaksinën kundër COVID-19 “në heshtje”, në janar

Zyrtarët shëndetësorë, përfshirë Dr. Anthony Fauci, kanë thënë se zëri i Trumpit në promovimin e vaksinës do të shkonte shumë në bindjen e republikanëve për ta marrë atë. Sondazhet kanë treguar se republikanët kanë më shumë gjasa të thonë se janë të kujdesshëm ose nuk planifikojnë të vaksinohen.

Trump ka bërë përpjekje të vogla për të promovuar vaksinën, përfshirë në një fjalim në CPAC, por ai nuk u paraqit në një njoftim të shërbimit publik me ish-presidentët që u lëshua javën e kaluar.

Psaki vuri në dukje se ata presidentë – Barack Obama, George W. Bush, Bill Clinton dhe Jimmy Carter – “nuk kishin nevojë për një ftesë të gdhendur” për të promovuar vaksinën. /Telegrafi/