Ronaldo tregon si i lindi ideja për festimin e famshëm ‘Siiii!’

Cristiano Ronaldo ka shpjeguar se si e ka nisur festimin e tij të famshëm, ‘Siiii!’, para dhjetë vitesh, ndërsa ka pranuar se është një lloj imitimi dhe se jo e gjithë ideja është origjinale.

Superylli i Juventusit ka treguar se e ka kopjuar piruetën (lëvizje në balet) dhe brohoritjen spanjolle për ‘po’ nga ish-bashkëlojtarët e tij te Real Madridi.

Kur është pyetur se pse e ka bërë këtë version dhe e ka mbajtur, 34-vjeçari ka thënë: “Gjithmonë them se gjërat e mira ndodhin në mënyrë të natyrshme”.

Portugezi i ka bërë këto pohime gjatë një interviste të gjatë për shërbimin DAZN, ku ka rrëfyer se gjatë gjithë karrierës së tij ka mësuar që vazhdimisht t’i dërgojë gjërat në tjetër nivel.

“Kam nisur ta them kur isha te Real Madridi. Kur fitonim, të gjithë thoshin: ‘Siiii!’. Fillova ta them edhe unë, nuk e di pse. Më erdhi natyrshëm”.

“Më kujtohen ndeshjet parasezonale në Los Angeles. Luajtëm kundër Chelseat, shënova gol dhe e bëra këtë (mimikën dhe festimin). Njerëzit më pyetën: ‘Pse e bëre?’ Nuk e di. E bëra, u rrotullova, por natyrshëm”, ka treguar Ronaldo. /Telegrafi/