Problem me kordat e zërit, Adele anulon koncertet

Adele është detyruar t’i anulojë dy spektaklet finale të turneut të saj botëror, pas dëmtimit të kordave të zërit. Këshillat e mjekëve e kanë shtrënguar këngëtaren të shmangë daljen në skenë, për sa kohë është në këtë gjendje.

Zemërthyer, 29-vjeçarja u ka kërkuar ndjesë fansave të saj, e në postimin në Twitter, ku njoftonte anulimin e koncerteve që duhej të mbaheshin këtë fundjavë në stadiumin Wembley të Londrës, i quan dy spektaklet e mëhershme atje si më të mëdhatë e më të mirat në të gjithë jetën e vet.

Lexo po ashtu Adele konfirmon para 98 mijë fansave: Po e lë muzikën

Performanca në Wembley të shtunën dhe të dielën ishte pritur me padurim. Pavarësisht problemeve me zërin, interpretimet që beri më 28 dhe 29 korrik u pritën shumë mirë nga kritika – transmeton TCH.

The Guardian e përshkruante si “instinktivisht karizmatike”; Times e konsideron mbresëlënëse; ndërsa për The Telegraph, Adele është “tmerrësisht e natyrshme në skenë”.

Nga sa shpjegon ajo vet në Twitter, e ka sforcuar zërin më shume se zakonisht, e kjo ka sjellë për pasojë dëmtimin e kordave. “Vendosa të ndjek këshillën e mjekëve specialistë e të mos performoj këtë fundjavë”, sqaroi këngëtarja.

“Thjesht nuk do të doja që të shkërmoqesha aty në syrin tuaj, e të ikja dhe ta lija koncertin përgjysmë”, ka vazhduar ajo.

Tejet e sinqertë në pohimin e saj, Adele tregon se ishte aq e dëshpëruar që të mos i zhgënjente fansat e vet, sa kishte menduar që në dy shfaqjet e fundit të mos këndonte “live”.

“Por nuk e kam bërë kurrë një gjë të tillë, dhe nuk do t’ua bëja ndjekësve të mi as në një milion vite. Nuk do të isha unë pastaj në atë skenë”, është shprehur këngëtarja.

Kjo nuk është hera e parë që Adele ka pasur probleme me kordat zanore. Në vitin 2011, ajo u detyrua t’i nënshtrohej një ndërhyrjeje kirurgjikale për heqjen e një polipi beninj.