Podoljak: Putini nuk do të ndalet me kaq, nuk shkon në luftë të madhe për diçka të vogël

Këshilltari i presidentit ukrainas Mihajlo Podoljak po u kërkon aleatëve më shumë armë për të ndihmuar fushatën mbrojtëse të vendit të tij kundër pushtimit rus, duke pasur parasysh gjendjen aktuale të luftimeve.

“Në këtë fazë të luftës, problemi është se numri i armëve, dronëve, predhave apo municioneve të artilerisë nuk shpërndahet në mënyrë të barabartë. Kjo duhet të barazohet”, tha ai për gazetën gjermane Bild, transmeton Telegrafi.

Vetëm një skenar është i mundur, potencoi Podoljak dhe ai është forcimi maksimal i Ukrainës me armë të teknologjisë së lartë.

“Nuk është e nevojshme të flitet, por të investohet në prodhimin ushtarak”, tha ai, duke përmendur raketat me rreze të gjatë, dronë, granata dhe municione artilerie, sipas tij numri i armëve duhet të jetë i madh.

“E gjithë vija e frontit është 1300 kilometra”

Podoljak, i cili këshillon presidentin ukrainas Volodymyr Zelensky, vuri në dukje një front të gjatë ndërsa vendi i tij kërkon të mbrohet nga sulmet ruse në disa drejtime. “E gjithë vija e frontit është e gjatë 1,300 kilometra dhe luftimet po zhvillohen për 600 deri në 800 kilometra”.

Ai e vlerësoi situatën aktuale ushtarake si të vështirë sepse intensiteti i luftimeve nuk dobësohet, pavarësisht faktorëve klimatikë.

Rusia, sipas Podoljak nuk ka bërë përparim të rëndësishëm në një vit.

“Rusia po lufton masat, është kryer një mobilizim i fshehtë, shumë njerëz janë dërguar në front, shumë pajisje janë përqendruar dhe e gjithë kjo duhet të shkatërrohet”.

“Një njeri nuk shkon në një luftë të madhe nëse dëshiron të kënaqet me një të vogël”

Podoljak gjithashtu supozon se lufta do të vazhdojë sipas planeve të presidentit rus Vladimir Putin “derisa ai të pushtojë të gjithë territorin e Ukrainës, derisa të arrijë dominimin në Evropë, derisa të pushtojë pjesën tjetër të territoreve post-sovjetike”.

“Një njeri nuk shkon në një luftë të madhe pasi shkatërron reputacionin dhe marrëdhëniet e tij nëse dëshiron të kënaqet me diçka të vogël. Është e pakuptimtë”, përfundoi ai. /Telegrafi/