Botë Nga Bota Evropa

Pesë pika kyçe të intervistës ‘bombastike’ të Zelenskyt?

Para 2 muajve

Presidenti ukrainas, Volodymyr Zelensky ka sugjeruar që një marrëveshje armëpushimi mund të arrihet nëse territori ukrainas që ai kontrollon mund të merret “nën ombrellën e NATO-s” – duke e lejuar atë të negociojë kthimin e pjesës tjetër më vonë “në mënyrë diplomatike”.

Presidentit ukrainas iu kërkua t’i përgjigjet raporteve të mediave se një nga planet e presidentit të zgjedhur të SHBA-së, Donald Trump, për t’i dhënë fund luftës në Ukrainë, mund të jetë që Kievi t’i dorëzojë Rusisë tokën që ka marrë, në këmbim të anëtarësimit të Ukrainës në NATO.

Mbrojtja e NATO-s për një pjesë të Ukrainës?

Kur u pyet për NATO-n, Zelensky tha “askush nuk i ka ofruar” Ukrainës një vend në aleancë, por ai sugjeroi që nëse do të bëhej një ftesë për pjesët e vendit që ushtria e tij kontrollon, kjo mund të përfundonte “fazën e nxehtë” të luftës, shkruan skynews.

Kjo do të ishte nën kushte që ftesa e NATO-s të njeh kufijtë ndërkombëtarisht të pranuar të Ukrainës – duke përfshirë Krimenë dhe zonat në lindje të vendit që aktualisht janë të pushtuara nga Rusia.

Ai dukej se e pranoi që pjesët e pushtuara të vendit do të qëndronin jashtë një marrëveshjeje të tillë për momentin dhe se rikthimi i mundshëm i këtyre zonave do të negociohej diplomatikisht në një datë të ardhshme.

Puna me Trumpin

Zelensky tha se nuk kishte biseduar me presidentin e zgjedhur që nga muaji shtator, por shtoi se ai dëshiron që të dy të shkëmbejnë ide.

“Patëm një bisedë. Ishte shumë e ngrohtë, e mirë, konstruktive… Ishte një takim shumë i mirë dhe një hap i rëndësishëm i parë – tani duhet të përgatisim disa takime”, tha ai.

Ai gjithashtu foli për nevojën e mbështetjes bipartizane nga të dyja partitë, demokratët dhe republikanët, duke thënë se ka “shumë zëra nga të dyja partitë që janë në anën tonë”.

“Një popull më i rëndësishëm se toka”

Kreu i Ukrainës tha se ishte “e vështirë” të fliste për moralin e ushtarëve në front, mes raporteve se ai është i ulët.

Ai foli për rëndësinë kryesore të popullit të vendit të tij, më shumë sesa të territorit.

“Kjo luftë (është) për pavarësinë e popullit, jo të tokës. Toka është shumë e rëndësishme, është pjesë e identitetit. Por, populli është më i rëndësishmi”, pohoi ai.

Mosha e thirrjes në ushtri

Zelensky e injoroi një pyetje për moshën e thirrjes në ushtri në Ukrainë, pas sugjerimeve të kohëve të fundit në disa qarqe se ajo duhet të ulet në 18 vjeç për të lehtësuar mungesën e fuqisë punëtore në Kiev.

“Unë besoj se kemi shumë ushtarë, por kufizimi është se, sinqerisht, ne duhet të shpëtojmë sa më shumë jetë të mundshme”, tha ai.

“Dhe nëse në zyrat evropiane apo amerikane ka një ide që duhet të bëjmë diçka ndryshe për moshën e thirrjes, dua thjesht të kërkoj nga partnerët tanë të bëjnë pjesën e tyre të punës, dhe ne do të merremi me punën tonë”, shtoi lideri ukrainas.

Putin është terrorist

Putin “mendon se ne jemi pjesë e Rusisë”, tha zoti Zelensky, duke shtuar se askush nuk mund ta ndryshojë mendimin e kreut të Kremlinit.

Në një zhvillim të rëndësishëm, ai sugjeroi se do të ishte i hapur për të biseduar me liderin rus.

Por, ai shtoi se “Jo për t’i dhënë atij mundësinë të na japë një ultimatum… sepse ai është një vrasës, dhe ai është një terrorist, dhe ai është vetëm”. /Telegrafi/