Peja fiton dramën në ‘Minatori’, mposht Trepçën në sekondën e fundit

Përkundër super mundësisë, Trepça nuk ka shënuar asnjë pikë në shtatë minutat e fundit të ndeshjes sot ndaj Pejës për ta humbur atë në sekondën e fundit të ndeshjes.

Shtatë minuta para fundit të takimit, Samir Zekiqi shënoi për 54-44 në të mirë të Trepçës, ndërsa “Minatori” i stërmbushur jehoi.

Në shtatë minutat e mbetura Peja afroi rezultatin, barazoi dhe përmes pikëve të amerikanit LaMarcus Reed në sekondën e fundit, ka fituar ndeshjen, 54-56.

Peja e nisi më mirë ndeshjen sonte, ku pas çerekut të parë krijoi epërsi 8 pikëshe, ndërsa në çerekun e dytë, mitrovicasit e ulën atë në 5, për të shkuar në pushim të pjesëve.

Çereku i tretë ka qenë fantastik për ekipin mitrovicas, ata e ndalën Pejën në vetëm 8 pikë, ku rezultati i këtij çereku ishte, 20-8, transmeton Borozani.

E në të fundit, Peja riktheu gjithçka për të çuar dramën deri në sekondën e fundit të ndeshjes, ku Trepça shënoi vetëm 3 e Peja 12 pikë për të fituar ndeshjen.

Frederic Stutz shënoi 18 pikë e 9 kërcime sonte te Trepça, ndërsa pikë dyshifrore shënoi vetëm edhe Montrael Scott, që përfundoi takimin me 11 pikë e 4 kërcime.

Në anën tjetër, te Peja përveç heroit LaMarcus Reed që përfundoi ndeshjen me 9 pikë, më efikasi ka qenë Salih Nuhanovic me 14 pikë e 6 kërcime, ndërsa pas tij Alban Veseli ka kontribuuar me 11 pikë tjera në fitore.

Peja me këtë fitore vazhdon serinë e pamposhtshmërisë në Superligë duke e çuar bilancin në 3-0, ndërsa Trepça përjetoi disfatën e parë në Superligë këtë stinor dhe tash ka bilanc 2-1.