Osmani thotë se ka biseduar gjatë me Kurtin, pas takimit të tij me emisarët ndërkombëtarë

Presidentja e Kosovës, Vjosa Osmani, njoftoi të premten se ka zhvilluar një bisedë të gjatë me kryeministrin Albin Kurti, në lidhje me takimin e tij me pesë emisarët ndërkombëtarë në dialogun Kosovë-Serbi.

Në lidhje me atë se çka është diskutuar gjatë takimit, Osmani tha se ka biseduar gjerë e gjatë me Kurtin, por nuk pranoi të japë më shumë detaje.

“Unë jam takuar gjatë sot me kryeministrin dhe kemi diskutuar për këto punë”, tha Osmani për Klan Kosovën, gjatë vizitës në Komunën e Skenderajt e cila të enjten u vërshua për shkak të reshjeve të shiut.

Paraditen e 20 janarit, pesë diplomatë qëndruan në Prishtinë, ku u takuan me kryeministrin Kurti.

Në takim ishin ndërmjetësi i Bashkimit Evropian për dialogun Kosovë-Serbi, Miroslav Lajçak dhe i deleguari amerikan, Gabriel Escobar. Kësaj radhe me Lajçakun dhe Escobarin ishin edhe tre këshilltarët e jashtëm të kancelarit gjerman, Olaf Scholz, presidentit francez, Emmanuel Macron dhe kryeministres italiane, Giorgia Meloni.

Pas këtij takimi, në një deklaratë para mediave, Lajçak tha se delegacioni i emisarëve ndërkombëtarë ka pritur me shumë mirëkuptim rreth mundësive që ofron propozimi për normalizim të marrëdhënieve ndërmjet Prishtinës dhe Beogradit.

“Është shumë herët për të bërë deklarata dramatike, sepse, siç e dini, ne jemi në mesin e misionit tonë dhe do të vazhdojmë për në Beograd, kështu që nuk kam shumë çfarë të them. Por, dua të them se megjithatë, në këtë pikë, ne kemi pritur që të kuptohen më mirë mundësitë që i ofron ky propozim. Shpresoj të mbërrijmë atje, te mirëkuptimi i plotë, si dhe shfrytëzimi i plotë i potencialit që ka ky propozim. Ne do të vazhdojmë të punojmë në këtë”, tha Lajçak të premten në Prishtinë.

Propozimi i BE-së apo plani franko-gjerman, iu dorëzua autoriteteve në Prishtinë dhe Beograd në fund të verës dhe mbështetet nga Franca, Gjermania dhe SHBA-ja.

Zyrtarët në Prishtinë kanë thënë se ky propozim paraqet një bazë të mirë për të vazhduar dialogun me Serbinë, ndërsa ata në Beograd kanë thënë se nuk është i favorshëm për ta. /Telegrafi/