Onischenko i befasuar që po i merret shtetësia e RMV-së: Aplikimin e kam bërë me dokumente valide

Qeveria e Maqedonisë së Veriut ka nisur procedurë për marrjen e nënshtetësisë biznesmenit Oleksandr Onischenko.

Në një prononcim për “Sloboden Pecat”, Onischenko tha se është i befasuar, pasi aplikimin e ka bërë me dokumente valide.

“Në shtetësinë time nuk ka mashtrim asnjë gram. Nuk e di çfarë të them. Kërkuan nga unë ta prezantojë Maqedoninë dhe të ndihmoj për organizimin e Lojërave Olimpike. Nëse nuk duan, unë do ta bëjë këtë në mënyrën time. Këtë Federata e ka kërkuar nga unë”.

“I kam dhënë të gjitha dokumentet zyrtare gjatë aplikimit. Pasaportën time ruse dhe certifikatën nga libri amë. Kam edhe pasaportë ruse edhe ukrainase. Kur kam aplikuar për shtetësi të RMV-së e kam bërë me pasaportën ruse. Unë jam person zyrtar dhe nuk mund të kem dokumente jo valide”, tha Onischenko.

Ndryshe, mësohet se Agjencia për Siguri Kombëtare ka filluar procedurë për shqyrtimin e dhënies së shtetësisë për të gjithë personat e veçantë kulturor, sportiv ose shkencor, për të parë nëse ka lëshime të tjera./Telegrafi/