Ole Gunnar Solskjaer zbulon se kush duhet të fajësohet për formën e dobët të Rashford

Trajneri norvegjez, Ole Gunnar Solskjaer, ka dhënë së fundmi një intervistë ku mes të tjerash ka folur për periudhën e tij si trajner i Manchester United, si dhe është ndalur të flas edhe për Marcus Rashford.

Në pyetjen hipotetike se kush mund të cilësohet si fajtor për formën e dobët të Rashford këtë sezon, norvegjezi tha se kjo nuk është një përgjegjësi e Erik Ten Hag, duke shtuar se kjo barrë bie mbi supet e vet lojtarit.

“Natyrisht, unë e kam stërvitur Rashford për tri vite dhe tashmë e njoh atë. Nuk është puna ime që të diskutoj performancat e tij, por sezonin e kaluar ai ishte fantastik dhe gjithçka ka të bëjë me konsistencën në futboll”, ka thënë Solskjaer për Reuters.

“Marcus dhe të tjerët që nuk kanë arritur majat këtë sezon. Unë jam i sigurtë që ai tashmë ka marrë masa për ta ndryshuar situatën dhe shpresoj se do të vazhdojë kështu”.

“A është detyra e trajnerit për të nxjerrë më të mirën nga ai, apo është detyrë e atij personalisht ose përgjegjësi e secilit lojtar për të nxjerrë më të mirën nga vetja? Mendoj se qëndron më shumë kjo e fundit”, është shprehur tekniku norvegjez.

Rashford kishte arritur të shënojë 30 gola sezonin e kaluar, por gjatë këtij edicioni ka realizuar vetëm gjashtë gola në të gjitha garat./Telegrafi/