OBRM-PDUKM: Nuk do ta mbështesim marrëveshjen me Bullgarinë

OBRM-PDUKM-ja nuk do ta mbështesë marrëveshjen për fqinjësi të mirë me Bullgarinë në Parlamentin e Maqedonisë. Ky është njëri nga përfundimet e seancës së Komitetit Qendror të OBRM-PDUKM-së që u mbajt mbrëmë.

Siç thuhet në kumtesën e partisë, në lidhje me çështjen e Marrëveshjes për fqinjësi të mirë, pas përfundimeve të diskutimeve mes shumicës së anëtarëve, u sublimuan disa përfundime, përcjell Telegrafi Maqedoni.

“OBRM-PDUKM vlerëson se është mirë të nënshkruhet marrëveshje për fqinjësi të mirë me Bullgarinë, për arsye të forcimit të bashkëpunimit dhe miqësisë mes shteteve. Për kët arsye në kohën kur qeveriste OBRM-PDUKM-ja, për vite me radhë kishte bisedime për tekstin e marrëveshjes, por nuk arrinim dakord”, thuhet në njoftimin e OBRM-PDUKM-së.

Në kumtesën e kësaj partie gjithashtu thuhet se, gjatë prezantimit të marrëveshjes para deputetëve në Kuvend, kur kryeministri Zaev tregoi se teksti nuk është përfundimtar dhe mund të korrigjohet, ishte e qartë se Maqedonia ka pranuar pozicionet e Bullgarisë për çështjet me rëndësi./Telegrafi/