OBRM-PDUKM: Nuk duhet të pengohet mbajtja e referendumeve

Në konferencë për shtyp të OBRM-PDUKM-së, Zllatko Perinski tha se KSHZ duhet të veprojë sipas ligjit dhe të mos mundohet të ndalojë mbajtjen e referendumeve lokale në komunat në mbarë vendin kundër kampeve për refugjatë.

“LSDM nuk guxon të kryejë shtypje mbi KSHZ, me qëllim që ai të mos e respektojë ligjin dhe të ndalë mbajtjen e referendumeve lokale, vetëm se me këtë do të dështojë plani i tyre për vendosje të refugjatëve në territorin e Maqedonisë. Apelojmë që KSHZ të mos dorëzohet ndaj shtypjeve të LSDM-së dhe ta kryejë obligimin ligjor duke lejuar mbajtjen e referendumeve ku qytetarët do ta japin vendimin e tyre për çështjen e kampeve për refugjatë në qytetet e tyre”, thuhet nga OBRM-PDUKM.

Ai shtoi se në vend se Qeveria e LSDM-së të lejojë mbajtjen e referendumeve, ata mundohen të realizojnë planin e tyre për vendosje të refugjatëve, dhe në vend se të bëjnë strategji për gjetje të vendve të punës për të rinjtë e vendit ata kërkojnë strategji për çështjen e refugjatëve./Telegrafi/