Një Pedagog i mirë, është më i mirë se libri i tij

Jo vetëm unë që pata fatin ta njohë, por edhe ish studentët e tij, shoqëria, miqësia, familjarët dhe rrethi ku jeton, mund të vërejnë këtë njeri të urtë, ligjërues dhe edukator i veçantë, intelektual i matur me virtyte të çmuara njerëzore, kombëtare e ndërkombëtare. Njeri punëtor, energjik dhe i gjithanshëm

Nga: Rexhep Kryeziu, Zvicër

I veçantë në çdo aspekt. Kur them i veçantë, dua të them i respektuar, i dashur, i dalluar nga të tjerët, sepse zhvillon brendësinë shpirtërore të vetën, jep respekt që meriton. Është një person i paharruar, që meriton admirimin e të tjerëve.

Ai nuk e din dhe nuk e mbanë vetën si i veçantë. Por, për t’i treguar se është vërtetë i veçantë, kërkohet t’i gjesh bërthamën unike, të brendshme, që mbart në veten e vet, sepse profesori bën punën e tij të nevojshme në shërbim të shoqërisë, në shërbimin tonë, të atdheut dhe kombit. Pra, kjo është bërthama. Pavarësisht se si e quajmë këtë thelb, shpirtin e tij, duhet ta pranojmë se është intelektual, e mbi të gjitha, njeri i ndërtuar e bashkëkohor. Kështu e njoh unë profesorin e nderuar Andrea Shundin.

Unë nuk do të thellohem në punën dhe të kaluarën e profesorit. Të gjithë mund ta gjejnë dhe lexojnë në internet biografinë dhe veprimtarinë e tij të bujshme, si në anglisht poashtu edhe në shqip. Kërkojeni dhe mund ta gjeni!

Me Prof. Dr Andrea Shundin dhe disa nga veprat e tij

Andrea Shundi (i lindur në vitin 1934) është agronom shqiptaro-amerikan i shekullit të 20-të dhe 21-të. Hulumtimet shkencore dhe botimet e tij, përqendrohen kryesisht në sistemet e foragjereve si dhe në ushqimet burimore te bagëtive, në vreshtari dhe verëtari, si dhe në historinë e bujqësisë shqiptare.

Është një nga autorët kryesorë të teksteve shkollore të nivelit universitar në Shqipëri. Ishte ligjërues dhe dekan në Fakultetin e Bujqësisë të Universitetit Bujqësor të Tiranës.

Profesor Shundi ka qenë dhe është pjesëmarrës aktiv në shumë konferenca dhe simpoziume ndërkombëtare në sistemet e foragjereve dhe vreshtarisë. Ai ka ligjëruar shpesh në universitetet bujqësore italiane dhe greke.

Është organizatori i konferencës së parë pan-shqiptare mbi punën shkencore të bujqësisë në vitin 1975. Poashtu është organizator i konferencës së dytë dhe të fundit ne vitin 1991 të këtij niveli. Ai është i pari që në Rahovec organizoj simpoziumin shkencor mbi kultivarin e hardhisë Vranç, për t’u rikthyer në identitetin e vet, në emrin e kultivarit në gjuhen shqipe, nga Vranac, siç e quanin më parë, ne Vranç, ashtu si e meriton dhe quhet tani.

Libri ‘Verëtaria Praktike’ në bashkëautorësi me Prof. Dr Andrea Shundi

Për ta njohur mirë profesorin, jo vetëm që duhet të lexoni shumë nga punimet dhe veprat e tij, por edhe të kaloni ca kohë me të. Është një enciklopedi e vërtetë.

Prandaj, konsideroj që është me të vërtetë njeri i veçantë. Ai befason me aftësinë që posedon, me njohuritë e gjithanshme, me urtësinë e shpirtit të tij njerëzor, me reagimet e tij ndaj të padrejtës dhe mirësjelljen ndaj injorancës, me këshillat e tij prej një pedagogu, i qetë dhe mik i vërtetë, që duhet dëgjuar dhe respektuar. I rreptë ndaj padrejtësive.

Ky është idoli im i profesionit, punës dhe veprës sime. Me krenari e them, kam një idol që i takon kombit tim shqiptar.