Ngritet padi penale kundër “TEC Manastir” dhe drejtorit të ELEM-it

Shoqata nga Manastiri “Për ne bëhet fjalë” sot në Prokurorinë Themelore Publike – Manastir ka dorëzuar padi penale kundër drejtorit të përgjithshëm të ELEM-it Kristijan Mickovskit, kundër pesë personave të tjerë dhe kundër kombinatit energjetik TEC Manastir, përcjell Telegrafi Maqedoni.

Nga shoqata “Për ne bëhet fjalë” shprehen se prej vitit 2010 deri më sot, kombinati energjetik TEC Manastir nuk e ka penguar përhapjen e mbetjeve të dëmshme në rajonin e Pellagonisë.

“Padia penale është vetëm fillimi i një procesi gjyqësor. Në rast nevoje, padia do të mbërrijë edhe deri te gjykatat ndërkombëtare, derisa ky problem me të cilin ballafaqohen qytetarët e rajonit të Pellagonisë nuk zgjidhet tërësisht”, u shpreh Ilija Balltovski, nga Shoqata “Për ne bëhet fjalë”.

Sipas shoqatës, mbetjet që barten në deponinë e kombinatit energjetik TEC Manastir përmbajnë elemente radioaktive dhe grimca që kanë efekt tejet negativ mbi shëndetin e njerëzve si dhe mbi ambientin jetësor./Telegrafi/