Napoli me dietë speciale për ndeshjen me Real Madridin

Edhe pak ditë e ndajnë Napolin nga përballja historike me Real Madridin, e vlefshme për 1/8 e finales së Ligës së Kampionëve.

Klubi italian po e vlerëson maksimalisht këtë ndeshje dhe në kuadër të kësaj sfide do të ndryshojnë edhe dietën.

Sipas gazetës napolitane “Il Mattino”, Hysaj me shokë do të nisin një dietë të veçantë të përgatitur nga tre specialistë italianë ushqimi dhe kjo dietë e ndalon rreptësisht picën, specialitetin e qytetit të Napolit.

Për mëngjes vetëm ushqime që treten lehtë. Nuk bëhet fjalë për kapuçino dhe krosante. Kafe, drithëra, fruta të stinës dhe fruta të thata. Ata që duan të kripurat, proshutë dhe parmexhan.

Për drekë do të ndiqet dieta mesdhetare. Lojtarët mund të hanë makarona, oriz, vaj ulliri, domate mish i bardhë, pulë ose peshk.

Edhe pse pica lejohet të hahet 48 orë para ndeshjes, Napoli ka vendosur që këtë javë të mos konsumojë fare picë, në mënyrë që në Bernabeu futbollistët të jenë në 100% të formës. Ia vlen një sakrificë e vogël për të marrë rezultat ndaj Realit.