Ministri Murati pret delegacione nga Kroacia dhe Suedia

Ministri i Diasporës, Valon Murati priti në dy takime të ndara një delegacion të diasporës shqiptare nga Republika e Kroacisë, kryesuar nga deputetja shqiptare në parlamentin kroat, Ermina Lekaj, dhe delegacionin nga Suedia, përkatësisht. Idriz Zogaj, trajner i ekipit kombëtar suedez në garën e memories.

Gjatë takimit me deputeten Lekaj, kryetarin e Unionit të Shqiptarëve në Kroaci, Esad Qollaku, kryetarin e organizatës së veteranëve Shqiptarë të luftës në Kroaci, Tom Kaçinari, futbollistin e mirënjohur Ardian Kozniku, u diskutua thellimi i bashkëpunimit mes Ministrisë së Diasporës dhe shoqatave Shqiptare në Kroaci.

Në këtë takim ministri Murati u njoftua me iniciativën për themelimin e qendrës kulturore Shqiptare në Kroaci, si dhe u kërkua ndihma institucionale nga Qeveria e Kosovës për këtë çështje.

Ministri Murati u zotua në përkrahjen institucionale në kuadër të mandatit mbi të cilin punon Ministria e Diasporës në koordinim të plotë edhe me institucionet relevante në Republikën e Shqipërisë.

Po ashtu, ministri Murati u njoftua edhe për procesin e identifikimit të shqiptarëve të vrarë në Kroaci gjatë luftës, dhe kërkuan që qytetarët e Kosovës ë cilët kanë të afërm të zhdukur gjatë kësaj lufte të lajmërohen në ambasadën e Kroacisë në Prishtinë.

Në anën tjetër, gjatë takimit me Idriz Zogaj, i cili njëkohësisht është edhe fitues i kampionatit botëror të memories, ministri u njoftua me sukseset individuale por edhe ekipore që janë arritur në garën e memories, si dhe iniciativat për promovimin e kësaj disipline edhe në Kosovë.

Ministri Murati falënderoi Zogajn për vizitën dhe për iniciativat e tij duke e quajtur jo vetëm si kontribut të pjesëtarëve të diasporës, por edhe mundësi e mirë që fëmijët të zhvillojnë trurin dhe të përmirësohen dukshëm në procesin mësimor. /Telegrafi/