Messi: Barcelona duhet të përmirësohet në shumë fusha

Lionel Messi ka paralajmëruar Barcelonën se ata duhet të përmirësohen në shumë fusha pas barazimit 1-1 në shtëpi me Athletic Bilbaon të shtunën mbrëma.

Ylli argjentinas filloi ndeshjen si zëvendësues dhe ndihmoi Munir El Haddadi për golin e barazimit të Barçës.

Megjithatë, gjiganti katalunas nuk mundi të marrë fitoren dhe kjo është ndeshja e tretë radhazi pa fitore.

Lexo po ashtu Barcelona dështon për të tretën herë me radhë në kampionat, ndalet me barazim nga Bilbao

“Ne kemi skuadrën dhe lojtarët që të mos varemi nga askush dhe të fitojmë çdo ndeshje”, ka thënë fillimisht Messi për GolTV.

“Rezultatet tona të fundit kanë qenë zhgënjyese, por duhet të jemi të qetë dhe mos harroni se sezoni është shumë i gjatë”.

“Ndaj Bilbaos vazhduam të përpiqeshim për fitore dhe mendoj se kishim shumë shanse”.

Lexo po ashtu Barcelona 1-1 Bilbao, notat e lojtarëve

“Mendoj se mund të kishim fituar, por duhet të vazhdojmë të presim të mërkurën, kur kemi një lojë shumë të vështirë. Është një lojë e madhe për mënyrën se si grupi do të reagojë”.

“Ne duhet të përmirësohemi në shumë fusha. Duhet të bëhemi më të fortë në mbrojtje. Nuk mund të pranojmë aq shumë gola në çdo ndeshje, pasi kemi ardhur nga një sezon kur ishte shumë e vështirë për të shënuar kundër nesh”, përfundoi ylli argjentinas. /Telegrafi/