Mbretëria e Bashkuar godet Rusinë me sanksione të reja, duke ndaluar eksportin e mjeteve që përdor në fushën e betejës

Mbretëria e Bashkuar ka njoftuar sanksione të reja ruse, duke ndaluar çdo send që Moska ka përdorur në fushën e betejës në Ukrainë.

Paketa e sanksioneve dhe masave tregtare të koordinuara ndërkombëtarisht përfshin ndalimin e eksportit për qindra mallra, të tilla si pjesë aeroplanësh, pajisje radio dhe komponentë elektronikë ushtarakë, transmeton Telegrafi.

Sanksionet e Mbretërisë së Bashkuar ndaj Rusisë tani arrijnë në 1500 dhe synojnë 92 individë dhe subjekte, duke përfshirë ata të lidhur me kompaninë ruse të energjisë bërthamore Rosatom.

Aleatët e ngushtë të presidentit rus Vladimir Putinit gjithashtu u sanksionuan, duke përfshirë ish-shefin e tij të sigurisë dhe shefin ekzekutiv të gazsjellësit Nord Stream 2.

Si pjesë e pakos së sotme janë sanksionuar edhe katër banka, përfshirë MTS-në.

“Ukrainasit po e kthejnë valën ndaj Rusisë, por ata nuk mund ta bëjnë të vetëm. Kjo është arsyeja pse ne duhet të bëjmë më shumë për të ndihmuar Ukrainën të fitojë”, tha Sekretari i Jashtëm, James Cleverly.

“Sot ne po sanksionojmë elitat që drejtojnë industritë kryesore të Putinit dhe po angazhohemi të ndalojmë eksportin në Rusi të çdo artikulli që Rusia është gjetur se ka përdorur në fushën e betejës”.

Zyra e Jashtme tha se inteligjenca ushtarake ka treguar se sanksionet kanë shkaktuar tashmë mungesën e komponentëve në Rusi, gjë që po ndikon në aftësinë e tyre për të prodhuar pajisje ushtarake për eksport.

Zyra shtoi se sanksionet e reja të sotme do t’i “dëmtojnë ato më tej” dhe do të minojnë “makinën ushtarake të Putinit”. /Telegrafi/