Mbi 8000 studentë presin të bëhen pjesë e re e Universitetit të Prishtinës

Më shumë se 8,000 studentë të rinj pritet të bëhen pjesë e Universitetit të Prishtinës, “Hasan Prishtina”.

Afrim Hoti, prorektor për marrëdhënie ndërkombëtare, është shprehur se në koordinim me kërkesën e fakulteteve, do të merret vendimi final për numrin e plotë të studentëve që do të pranohen, raporton KTV.

Sipas Hotit, nga takimet që i kanë pasur me zyrtarë të Ministrisë së Arsimit, nuk është vërejtur disponimi se mund të ketë propozim për rritje të numrit të të pranuarve.

Ndërkaq, sa u përket kategorive të lejuara nga pagesa, prorektori Hoti tha se për ta nuk vlen memorandumi, i cili liron nga pagat kategoritë e dala nga lufta, por sipas tij, lirime do të ketë vetëm për fëmijët e dëshmorëve.

Ndërkaq, njohësi i arsimit, Halim Hyseni, është shprehur se edhe numri për pranimin e 8,000 studentëve në vitin e ri akademik është i madh, pasi që duhet të bëhen analiza që të mos të kalohet proporcioni prej 1me10, që do të thotë 1 profesor dhe 10 studentë. Universiteti i Prishtinës numëron gjithsejtë 52 mijë studentë.