Lladrovci: Limaj e Krasniqi bënë fushatë të egër ndaj meje, u përgjigjem të hënën

Kandidati për kryetar të Drenasit nga radhët e PDK-së, Ramiz LLadrovci, i ka ftuar qytetarët që të dielën t’i bashkohen vizionit të partisë së tij.

Lladrovci përmes një postimi në Facebook, tha se drejtuesit e NISMA-s, Jakup Krasniqi dhe Fatmir Limaj, kanë udhëhequr një fushatë të egër ndaj tij dhe familjes së tij.

Ai thotë se përgjigjen atyre do t’ua jap të hënën duke aluduar në fitoren tij pas së dielës.

Postimi i plotë i Lladrovcit:

“Qytetarë të dashur të Drenasit,

Ju ftoj që të dielën, më 18 dhjetor, ta shprehni vullnetin tuaj të lirë, të garantuar me kushtetutë.

Ftoj veçanërisht qytetarët që nuk kanë marrë pjesë në procesin zgjedhor në raundin e parë, që t’i bashkohen vizionit të PDK-së, ofertës më të mirë për të gjithë qytetarët e komunës sonë, pa dallim.

Kohët e fundit, drejtuesit e NISMA-s, Jakup Krasniqi dhe Fatmir Limaj, kanë udhëhequr një fushatë të egër ndaj meje dhe familjes sime. Mirëpo, duke bartur mbi vete një përgjegjësi dhe kontribut atdhetar, njëherësh duke mos dashur që argumentet që posedoj të ndikojnë negativisht në garën zgjedhore të kandidatit që pa faj ndodhet në këtë mes, përgjigjet adekuate do t’i jap të hënën”, ka shkruar Lladrovci.