Lista e ministrave të rinj do të publikohet të premten

Cilët ministra do të mbeten pa funksione do të mbetet sekret deri të premten, kur pritet që kryeministri Zoran Zaev edhe zyrtarisht ta dorëzojë listën me ministrat e rinj në Kuvend.

Zyrtarisht akoma nuk është njoftuar asgjë, por emri i ri në kabinetin e kryeministrit pritet të jetë Goran Millevski, kryetari i Partisë Liberal-Demokrate, përcjell Telegrafi Maqedoni.

Ai nuk ka komentuar këtë informacion, ndërsa në një deklaratë për Kanal5 ka thënë se partia e tij pret që të ketë ministri pa resor.

“Nuk dua të komentoj. Vendimin për funksionarët e rinj është korrekte t’i publikojë mandatari Zoran Zaev. PLD pret që të marrë ministri pa resor”, tha Milevski.

Ajo që është e sigurt është se Ministria e Kulturës, Bujqësisë dhe ajo për Sistem Politik do të kenë udhëheqës të rinj.

Sipas informacioneve nga partia shqiptare në pushtet BDI, ministri aktual i Mjedisit Jetësor dhe Planifikimit Hapësinor Sadulla Duraku, do të jetë në krye të ministrisë së re për Sistem Politik, ndërsa në vend të tij pritet të ulet Naser Nuredini, djali i afaristit Aki Nuredini.

Në fillim të javës së ardhshme pritet të mbahet seanca kuvendare, në të cilën deputetët do të votojnë për përbërjen e re qeveritare./Telegrafi/