Kuvendi i Maqedonisë u shpërnda, zgjedhjet mbahen më 12 prill

Kuvendi i Maqedonisë së Veriut me 108 vota ‘për’ mori vendimin për shpërndarje në mënyrë që zgjedhjet të mbahen më 12 prill sipas marrëveshjes paraprake të kryetarëve të partive kryesore në vend.

Më herët shpërndarja e Kuvendit ishte paraparë të ndodhë më 12 shkurt, por kryetari i Kuvendit, Talat Xhaferi, tha se pas konsultimit që e ka bërë me Komisioni Shtetëror për Zgjedhje, ka vendosur që seancën kuvendare për shpërndarjen e Kuvendit ta caktojë, dje në orën 16:00, njofton Telegrafi Maqedoni.

Vendimin për shpërndarje u nis nga kreu i Kuvendit, Talat Xhaferi i cili në fjalimin e tij në seancën e djeshme dhe KSHZ kanë sqaruar mund që në afat prej 55 ditësh nga momenti i shpërndarjes së Kuvendit të organizojnë zgjedhje.

“Dhe për këtë arsye, duke analizuar dhe përllogaritur të gjitha afatet, momenti i fundit i shpërndarjes së Kuvendit duhet të jetë sot me qëllim që të sigurohen gjithë afatet dhe procedurat në kohë”, tha dje Xhaferi.

Sipas tij, të gjitha vendimet që janë miratuar në Kuvend janë në interes të qytetarëve dhe shtetit.

“Ndoshta kemi gabuar jemi njerëz. Personalisht nëse unë kam gabuar, gabimin nuk e kam bërë qëllimisht dhe kërkoj falje publikisht”, tha mes tjerash Xhaferi.

Para shpërndarjes, Kuvendi miratoi edhe Ligjin për Prokurori Publike dhe ndryshimet në Ligjin për Këshill të Prokurorëve Publike dhe Ligjin për Mbrojtje. Ligji për Prokurori Publike nuk u përkrah nga deputetët e OBRM-PDUKM-së, por u miratua me 80 vota ‘për’ dhe gjashtë vota ‘kundër’.

Para se të kryhet votimi kishte edhe një votim të ligjit, kur 74 deputetë votuan ‘për’ dhe 32 deputetë ‘kundër’. Kreu i Kuvendit, Talat Xhaferi e anuloi këtë votim për shkak se më herët, deputetja Liljana Popovska ka kërkuar fjalë. Një pjesë e deputetëve u ankuan se votimi nuk u është evidentuar.

Deputetët e OBRM-PDUKM-së thanë se është shkelur procedura dhe Rregullorja dhe se Xhaferi s’ka pasur të drejtë ta anulojë votimin e parë. Për këtë shkak, në konferencë për shtyp, kërkuan nga kryetari Stevo Pendarovski të mos nënshkruajë ligjin. Gjithashtu një gjë të tillë kërkuan edhe për Ligjin për Këshill të Prokurorëve Publike për shkak se, sipas tyre, nuk është respektuar parimi i Bandenterit.

Pasdite kabineti i kryetarit njoftoi se Pendarovski ka nënshkruar ligjet e miratuara në Kuvend duke përfshirë këtu edhe Ligjin për Prokurori Publike.

Ligji për PP sipas pushtetit, duhet të mundësojë shtet të së drejtës dhe barazi të qytetarëve para drejtësisë. Miratimi i këtij ligji, sipas tyre, është shenjë e mirë për vazhdimësinë e proceseve reformatore të vendit./Telegrafi/