Kurti në Gjilan: Muaji prill është vendimtar që nga kjo krizë të dalim sa më shpejt dhe me sa më pak raste

Kryeministri në detyrë, Albin Kurti i shoqëruar nga ministrat në detyrë, Emilija Rexhepi dhe Arben Vitia kanë takuar kryetarin e Gjilanit, Lutfi Haziri.

Pas këtij takimi, Kurti ka thënë se në këtë takim është njoftuar për së afërmi për gjendjen në Gjilan shkaku i pandemisë së coronavirusit.

“Erdhëm për vizitë në komunën e Gjilanit për të takuar kryetarin Lutfi Haziri dhe ekipin e tij, të cilët janë anëtarë të shtabit që po përballen në këtë luftë kundër përhapjes së coronavirusit. U njoftuam për së afërmi për të gjitha masat e ndërmarra në këtë komunë”, tha Kurti, shkruan Telegrafi.

Kurti apeloi tek qytetarët t’u përmbahen rekomandimeve nga institucionet shëndetësore, duke thënë se ky muaj është vendimtarë sa i përket kësaj pandemie.

“Jemi të gatshëm, të interesuar që këtë lakoren e shpërndarjes ta shtyjmë sa më shumë në kohë dhe ngritjen e saj ta bëjmë sa më të paktë të kësaj pandemie. Organizimi ynë qendror edhe lokal është shembullor. Muaji prill është muaji vendimtar që nga kjo krizë të dalim sa më shpejt dhe sa më pak raste, andaj ju lutem t’i respektoni rekomandimet”, tha Kurti. /Telegrafi/