Komiteti për politikë të jashtme AFET miratoi propozim-rezolutën për Maqedoninë

Komiteti për politikë të jashtme në Parlamentin Evropian – AFET, e miratoi propozim-rezolutën për përparimin e Maqedonisë në eurointegrime, me 54 vota për dhe 8 vota kundër, përcjell Telegrafi Maqedoni.

Sipas korrespondentit të agjencisë AIM nga Brukseli, fillimisht eurodeputetët ranë në ujdi për 28 amandamente, ku përmenden edhe termet ”Maqedonia” dhe ”maqedonase”, e të ngjashme.

Eurodeputetët parashohin edhe qeverisje të re në Maqedoni, duke kërkuar ”tranzicion transparent dhe në pajtim me kërkesat dhe procedurat kushtetuese dhe ligjore”. Kështu, kjo është rezoluta e tetë me radhë pozitive për Komisionin Evropian për të filluar bisedimet, duke vënë si kusht zbatimin e plotë të Marrëveshjes së Përzhinos dhe reformat urgjente prioritare.

Propozim-rezoluta vlerëson zgjedhjet e parakohshme të 11 dhjetorit të vitit të kaluar si zgjedhje të rregullta, pa probleme dhe të standardeve ndërkombëtare, përfshi udhëzimet e OBSE/ODIHR-it.

Një nga amandamentet e Parlamentit Evropian ka të bëjë edhe me komunitetin LGBT në Maqedoni, përmes së cilit, qeverisë dhe partive politike duhet t’u bëhet me dije për përgjegjësinë e tyre që me ligj dhe në praktikë të përfshihet kultura e tolerancës, promovimi i barazisë gjinore dhe më shumë pjesëmarrje të grave në jetën politike dhe në punësim.

Propozim-rezoluta kërkon nga Maqedonia që të ndërmerr masa për arritje të pajtimit historik për tejkalimin e ndasive ndërmjet bashkësive të ndryshme etnike dhe kombëtare, përfshirë edhe qytetarët e identitetit bullgar.

Rezoluta do të jetë në seancë plenare të PE-së më 14 mars. Të rikujtojmë se rezolutat e Parlamentit Evropian nuk kan rol detyrues, por këshillues./Telegrafi/