Kështu kanë ndryshuar Shqipëria dhe Zvicra që nga përballja e fundit

Të shtunën në ora 15:00 për futbollin shqiptar nis një epokë e re, ky është Evropiani ynë si do që të shkojë.

Shorti na vuri në Grupin A përballë Francez, Rumanisë e Zvicrës, me këtë të fundit luajmë ndeshjen e parë.

Herën e fundit kur jemi përballur me “helvetikët” ishte viti tetori i vitit 2013, luanim ndeshjen e dytë të kualifikueseve për Botërorin e Brazilit në “Qemal Stafa”. Ashtu siç kishte ndodhur në ndeshjen e parë të atyre kualifikueseve në Zvicër ku humbëm 2-0, edhe në Tiranë provuam shijen e hidhur të humbjes 2-1.

Por, sa ka ndryshuar kombëtarja jonë që nga ajo ndeshje? Në të vërtetë ndryshimet janë të dukshme. Mesfusha është reparti që pothuajse ka një fytyrë të re, ndërsa në total ka pesë ndryshime nga ai formacion me atë që pritet të luajë kombëtarja të shtunën.

Më 11 tetor 2013 në “Qemal Stafa” De Biasi do të hidhte në fushë këtë formacion: Berisha; Lila, Cana, Mavraj, Agolli; Gashi, Bulku, Rama, Kaçe, Abrashi; Salihi.

Ndërkohë që Odise Roshi pritet të jetë titullar në sfidën e parë të Shqipërisë në Evropian, gjithashtu do të ketë ndryshime në krahun e djathtë të mbrojtjes, pozicion ky që i takon Elseid Hysajt, po ashtu në mesfushë pritet të jenë Blerim Kukeli e Taulant Xhaka, ndërsa në sulm njëri mes Sokol Cikalleshit dhe Armando Sadikut.

Ndryshimet më të mëdha ka nga ndeshja e parë në shtator të vitit 2012, atëherë kur në formacion ishte Saimir Ujkani, Armend Dallku, Alban Meha, Emiljano Vila dhe Erion Bogdani.

Edhe Zvicra ka pësuar ndryshime nga sfida e fundit me Shqipërinë. Përpos trajnerit, Zvicra ka edhe pesë ndryshime në formacion nga ai i tetorit të 2013-s me atë që pritet të luajë të shtunën.

Formacioni i Zvicrës më 11 tetor 2013 në “Qemal Stafa”: Benaglio; Lang, Schar, Von Bergen, Rodriguez; Inler, Behrami; Shaqiri, Xhaka, Stocker; Seferovic.

Ndërsa në ndeshjen e parë të Evropianit të Francës, Petkovic pritet të hedhë në fushë këtë 11-she: Sommer; Lichtsteiner, Djourou, Schar, Rodriguez; Behrami, Xhaka, Dzemaili; Shaqiri, Seferovic, Mehmedi.